Respýblıka kúnine oraı Qazaqstan Prezıdentiniń atyna quttyqtaýlar kelip tústi
Reseı Prezıdenti Vladımır Pýtın Memleket basshysyn jáne Qazaqstan halqyn Respýblıka kúnimen quttyqtap, beıbitshilik jáne baq-bereke tiledi.
«Qazaqstan ekonomıkalyq, áleýmettik, ǵylymı-tehnıkalyq jáne basqa da salalarda tańǵalarlyq nátıjelerge qol jetkizdi, halyqaralyq isterde mańyzdy ról oınaıdy. Memleketterimiz arasyndaǵy strategııalyq seriktestik jáne odaqtastyq qarym-qatynastar tabysty damyp keledi», – delingen jedelhatta.
Qytaı Halyq Respýblıkasynyń Tóraǵasy Sı Tszınpın jedelhatynda Prezıdent Qasym-Jomart Toqaevtyń Ádiletti Qazaqstan qurý jolyndaǵy reformaǵa belsene kiriskenin atap ótip, qyrkúıek aıyndaǵy Qazaqstanǵa memlekettik sapary mazmundy ári jemisti bolǵanyn jetkizdi.
«Ekijaqty qarym-qatynastyń damýyna nazar aýdara otyryp, men Sizben birge Qytaı jáne Qazaqstan arasyndaǵy máńgilik jan-jaqty strategııalyq seriktestikti damytýǵa ázirmin», – dep jazylǵan jedelhatta.
Túrkııa Prezıdenti Rejep Taııp Erdoǵan Memleket basshysyn ulttyq merekemizben quttyqtaı kele, dostas ári baýyrlas Qazaqstannyń táýelsizdigin alǵash moıyndaǵan el retinde Túrkııa ótken 30 jyl ishinde Qazaqstannyń barlyq salada qol jetkizgen jetistikterine kýá bolyp kele jatqanyn aıtqan.
«Ortaq til, mádenıet jáne tarıhı baılanystardan nár alyp, «Keńeıtilgen strategııalyq seriktestik» deńgeıine jetken qarym-qatynasymyz ben yntymaqtastyǵymyzdy eki eldiń múddesine saı odan ári damytýǵa jáne tereńdetýge nıettimiz», – dep jazylǵan jedelhatta.
Frantsııa Prezıdenti Emmanýel Makron eki el arasynda dıplomatııalyq qarym-qatynas ornaǵanyna 30 jyl tolǵan osynaý aıryqsha kezeńde ekijaqty dıalogtyń qarqyndy damyp kele jatqanyna qýanyshty ekeni jazylǵan.
«Biz Siz júrgizip jatqan saıası, ekonomıkalyq jáne áleýmettik reformalardy aıryqsha qyzyǵýshylyqpen baqylap otyramyz, Frantsııa olardyń júzege asyrylýyn árqashan qoldaýǵa ázir ekenine senim bildirgim keledi», – dep jazylǵan jedelhatta.
Tájikstan Prezıdenti Emomalı Rahmon jedelhatynda ózara syılastyq pen senimniń berik tarıhı dástúrine negizdelgen qazaq-tájik qarym-qatynasy jan-jaqty damyp kele jatqanyna rızashylyǵyn bildirgen.
Túrikmenstan Prezıdenti Serdar Berdimuhamedov pen Túrikmenstannyń Mıllı Gengeshi Halq Maslahatynyń tóraǵasy Gýrbangýly Berdimuhamedov quttyqtaý jedelhattarynda túrikmen-qazaq strategııalyq seriktestigi eki el halqynyń ıgiligi úshin qarqyndy damı beretinine senim bildirdi.
Sondaı-aq Birikken Ulttar Uıymynyń Bas hatshysy Antonıý Gýterrısh Qazaqstan halqyn jáne Qasym-Jomart Toqaevty Respýblıka kúnimen quttyqtady.
«Osynaý aıryqsha kúni Birikken Ulttar Uıymy Qazaqstannyń barsha azamaty syn-qaterge tótep berip, Turaqty damý maqsattaryna jetý jolyndaǵy progresti jedeldetinine jáne álemniń barlyq halqynyń ıgiligi úshin ádiletti ári beıbit álemdi qurýdan tys qalmaıtynyna senim bildiredi», – dep atap ótti BUU Bas hatshysy.
Sonymen qatar Iran Islam Respýblıkasynyń Prezıdenti Ibrahım Raısı, Mońǵolııa Prezıdenti Ýhnaagıın Húrelsýh, Avstrııa Prezıdenti Aleksandr Van der Bellen, Horvatııa Prezıdenti Zoran Mılanovıch, Portýgalııa Prezıdenti Marselý Rebelý de Soýza, Serbııa Prezıdenti Aleksandr Výchıch, Sıngapýr Prezıdenti Halıma ıAkob, TMD Atqarýshy komıtetiniń tóraǵasy – atqarýshy hatshysy Sergeı Lebedev, Islam yntymaqtastyǵy uıymynyń bas hatshysy Hısseın Brahım Taha ózderiniń quttyqtaý jedelhattaryn joldaǵan.