Respýblıka kúni: Jetisý oblysynda kásipker aýylǵa sport keshenin salyp berdi
13:35, 24 Qazan 2022
TALDYQORǴAN. QazAqparat - Respýblıka kúni qarsańynda Jetisý oblysynyń Aqsý aýdanynda zamanaýı turǵyda salynǵan sport kesheni el ıgiligine berildi, dep habarlaıdy QazAqparat tilshisi.
Aqsýlyq azamat Súleımen Aıdyn Aıqanulynyń demeýshligimen salynǵan nysannyń jalpy quny - 350 mln teńge.
Jańa nysanda aýyl balalaryna basketbol, voleıbol, shaǵyn fýtbol, boks, qazaqsha, erkin kúrespen aınalysýǵa barlyq jaǵdaı jasalǵan. Qajetti sporttyq jabdyqtarmen tolyq qamtylǵan. Keshen jastardy salaýatty ómir saltyna baýlyp qana qoımaı, ýaqytty tıimdi paıdalanýǵa múmkindik bermek.
Sport kesheniniń ashylý saltanatyna Jetisý oblysy dene shynyqtyrý jáne sport basqarmasynyń basshysy Almat Úshkempirov, aýdandyq máslıhat hatshysy Beıbit Jańylysuly, aýdan ákiminiń orynbasary Ǵazız Otarbaıuly, mekeme, bólim basshylary, ardager sportshylar, aýyl aqsaqaldary, turǵyndar qatysty.