Respýblıka kúni: Pavlodarlyq oqýshylar men stýdentter aqshalaı syıaqy aldy

PAVLODAR. QazAqparat - Respýblıka kúni qarsańynda Pavlodar oblysynyń mektep oqýshylary men kolledj stýdentteri qomaqty júldelerge ıe boldy. Olar aqshalaı syıaqy men «Táýelsizdik ulany» tósbelgilerin óńir basshysynyń qolynan aldy, dep habarlaıdy QazAqparat.

Pavlodar oblysy ákimdiginen málim etkendeı, daryndy balalardy qoldaý maqsatynda óńirde «Táýelsizdik ulany» premııasy taǵaıyndalǵan. Júlde ıegerlerine 50 AEK nemese 159 myń teńge kóleminde syıaqy belgilendi.

Konkýrsqa qatysýǵa 700-den astam ótinish túsken. Jeńimpazdardy anyqtaý úshin táýelsiz qazylar alqasy qurylyp, nátıjisinde «Táýelsizdik ulany» premııasynyń 100 laýreaty anyqtaldy. Búginde sol jeńimpazdar oblys ákiminiń qolynan marapatqa ıe boldy.

Aımaq ákimi Ábilqaıyr Sqaqov premııa laýreattaryn quttyqtap, el bolashaǵynyń jastar qolynda ekenin taǵy bir ret atap ótti.

«Áleýmettik mańyzy bar jáne qoǵamdyq qyzmet» nomınatsııasynda belsendi azamattyq kózqaras úshin tórt mektep oqýshysy men kolledj stýdenti marapattaldy, 20-dan astam pavlodarlyq óren «Ǵylymı-tehnıkalyq shyǵarmashylyq jáne oqýshylyq-zertteý jumysy» atalymynda jeńiske jetti. Taǵy 20 adam sporttaǵy jetistikteri, kásibı jáne shyǵarmashylyq sheberligi úshin marapattaldy.