Respýblıka kúni: Elordada alaman báıge ótti

ASTANA. QazAqparat – Búgin Astanada Ulttyq merekege oraılastyrylǵan alaman jáne top báıge ótti. Oǵan elimizdiń ár qalasy men óńirinen kelgen shabandozdar qatysty, dep habarlaıdy QazAqparat tilshisi.

Jarys Astana mańynda ornalasqan «Etnoaýyl» ulttyq-mádenı kesheninde ótti. Ony tamashalaýǵa kelgen halyq qarasy kóp boldy.

«Jarystyń basty maqsaty – ulttyq jáne olımpıadalyq sport túrlerin keńinen nasıhattaý, keleshegi zor shabandozdar men jylqylardy anyqtaý. Saıysty Astana qalasynyń Ulttyq jáne olımpıadalyq at sporty túrleriniń federatsııasy, qalalyq «Dene shynyqtyrý jáne sport basqarmasy», Astana qalasy ákimdigi birlesip uıymdastyryp otyr», - dedi Astana qalalyq dene shynyqtyrý jáne sport basqarmasynyń baspasóz hatshysy Madına Aıtqalıeva.

Kelýshilerdiń pikirinshe, top jáne alaman báıge tartysty ótti. Shabandozdar kishi báıgede - 14, alamanda - 20 shaqyrym qashyqtyqta baq synasty. Top báıgege elimizdiń túkpir-túkpirinen kelgen 19 shabandoz qatysty. Al alamanda 30-ǵa jýyq qatysýshy ózara kim myqtyny anyqtady.

Jarystyń qorytyndysyna sáıkes, top báıgede Almaty oblysynyń namysyn qorǵaǵan Abzal Turǵambek (saıys aty «Velıkıı») márege birinshi keldi. Ekinshi oryndy qostanaılyq Nurasyl Ahmetov (saıys aty «Baqtory»), úshinshi oryn Aqmola oblysynan kelgen Nurtileý Yrymhan (saıys aty «Barsa») ıelendi.

Alaman báıgeniń bas júldesin «Aıbar» laqap atymen jylqysyn erttegen Almaty oblysynyń shabandozy Arnat Murathan jeńip aldy. Ekinshi oryn pavlodarlyq Ashat Raqymjanovqa (saıys aty «Chervonets») buıyrsa, úzdik úshtikti Túrkistan oblysynyń shabandozy Arnur Samatuly (saıys aty «Botagóz») qorytyndylady.

Barlyq jeńimpazdar men júldegerler aqshalaı syılyqtarmen marapattaldy. Qosa ketsek, báıgeniń júlde qory 17 mln teńge.