Jol apaty kezinde 8 adamdy qutqarǵan Murat Esenqabylov «Erligi úshin» medalimen marapattaldy
Qoǵamda úlken rezonans týdyrǵan jol apaty shilde aıynda boldy. Ulanbel – Sozaq – Sholaqqorǵan – Ekpindi tasjolynyń Shybyt – Shaıan eldi mekeniniń aralyǵynda 3 kólik soqtyǵysyp, iri jol apatyn jasady. Nissan, Toyota Camry jáne Volkswagen Grafter avtokólikteri soqtyǵysyp, tolyǵymen órtenip ketti. Oqys oqıǵa saldarynan 10 adam qaza tapsa, 12 adam jaraqat aldy.
Sozaq aýdany Babata aýylynyń turǵyny Murat Esenqabylov sol kólikterdiń biriniń ishinde boldy. Dereý esin jınaǵan ol órt ishinen 8 adamdy qaýipsiz jerge alyp shyqty.
«Toǵyz adam kóz aldymda jan tapsyrdy. Úsheýi mylja-myljasy shyqqan kóliktiń ishinde qysylyp, shyǵa almaı janyp ketti. Qaısysyn qutqararymdy bilmedim. Janyp jatqan kólikterdiń ishinen segiz adamdy kóterip alyp shyqtym. Keıinnen kelgen adamdar janyp jatqan kólikke jaqyndaýǵa seskenip turdy. Sebebi, janyp jatqan kóliktiń janarmaı bagy kez kelgen sátte jarylýy múmkin edi. Yńyrsyp jylap, keıbiri esin bilmeı jatqan dármensiz jaralylardy kólikten kóterip shyǵaryp kezeń-kezeńimen jol jıegine qaýipsiz jerge tasydym, - deıdi Murat Esenqabylov.
Túrkistan oblysy polıtsııa departamentiniń baspasóz qyzmetiniń bastyǵy Gúlnar Ábdijapparovanyń aıtýynsha, qaısar jandar bolmaǵanda oqys oqıǵa saldarynan qurbandar sany munan da kóp bolýy múmkin edi.
«Apatqa ushyraǵan kólikterdiń ishinde bolǵan Murat Esenqabylov júrgizýshiler men jolaýshylardy qutqarýda kózsiz batyrlyq tanytty. Olardyń adam ómirin arashalaýdaǵy batyldyǵy ben janqııarlyǵyn qoǵam joǵary baǵalady», - deıdi ol.
Respýblıka kúni qarsańynda Prezıdent Jarlyǵymen bir top azamat memlekettik nagradalarmen marapattaldy. Solardyń ishinde beıbit kúnniń batyry atanǵan Murat Esenqabylov «Erligi úshin» medalin ıelendi.
Eske salsaq, 17 shilde kúni Túrkistan oblysynda jol apatynan 9 adam qaza taýyp, 13 adam aýrýhanaǵa jetkizildi. Osy oqıǵa bolǵan kezde respýblıkada úsh kúnde jol apatynan 24 adam kóz jumǵan.
Túrkistan oblysy PD bastyǵynyń mindetin atqarýshy Baǵlanbek Aıtpaev óz bastaryn qaterge tige otyryp, ózgege járdem bergen eki turǵyndy arnaıy qabyldap, marapattady. Basqalarǵa úlgi bolarlyq batyldyq jasaǵan alyp júrekti azamattarǵa barsha polıtseıler atynan rızashylyq bildirip, Alǵys hat pen baǵaly syılyqtaryn tabystady.
Buǵan deıin olardy Sozaq aýdanynyń ákimi Muhıt Turysbekov arnaıy qabyldap, Alǵys hatpen marapattaǵan edi. Onda janyp jatqan kólikten adamdardy alyp shyqqan azamattar memlekettik marapatqa usynyldy.