Respýblıka kúni: Oralda 80-ge jýyq otbasy jańa qonys ıesi atandy

<p>ORAL. KAZINFORM &ndash; Oral qalasynda Respýblıka kúnine oraı turǵyn úı kezeginde turǵan azamattarǵa jańa páterler kiltteri tabys etildi.</p>

Oblys ortalyǵynda 78 otbasy jańa qonys ıesi atansa, sonyń 60-y 10-shaǵynaýdannan berildi. 
Páter kiltterin saltanatty tabystaý rásimine qala ákimi Murat Baımenov qatysyp, jańa baspana ıelerin qýanyshtarymen quttyqtady.

Foto: BQO ákimdigi

— Memleket basshysy óz Joldaýlarynda halyqtyń ál-aýqaty men ómir súrý sapasyn arttyrý memlekettiń basty mindeti ekenin atap ótti. Osy oraıda, ár otbasyn turǵyn úımen qamtamasyz etýge baǵyttalǵan bastamalar asa mańyzdy. Búginde Oral qalasynda memlekettik baǵdarlamalar arqyly 11 kóppáterli úıdiń qurylysy júrgizilýde. Sonyń beseýin jyl sońyna deıin qoldanysqa tapsyramyz. Páterler «Otbasy bank» AQ arqyly jeńildetilgen paıyzdyq nesıemen beriledi. «Turǵyn úı-kommýnaldyq ınfraqurylymdy damytýdyń 2023-2029 jyldarǵa arnalǵan tujyrymdasyna» sáıkes kezekte turǵan azamattarǵa memlekettik bıýdjet esebinen jańa páterler satyp alynady. Osy baǵytta ótken jyly qalamyzdyń ártúrli aýdanynan 25 jańa páter satyp alynsa, bıyl jalpy 175 jańa páter alý josparymyzda bar. Mine, búgin 78 páter kilti ıelerin tapty. Barshańyzdy osynaý qýanyshty kúnmen shyn júrekten quttyqtaımyn, - dedi shahar basshysy.

«2006 jyly turǵyn úı kezegine turdyq. Óz úıimiz joq, osyǵan deıin páter jaldap keldik. Úlken balam úshinshi toptaǵy múgedek, qıyndyq kórip júr edik. Búgin, mine, jańa páterge qol jetkizip jatyrmyz. Memleket qoldaýyna sheksiz rızamyz», — dedi jańa baspana ıeleriniń biri Baqyt Moldasheva.

Eske sala keteıik, budan buryn Oral qalasynda úılerdiń basym kópshiligine jylý berilgenin jazǵan bolatynbyz.