Respýblıka kúni barlyq óńirde jedel shtab jumys isteıdi – ІІM

<p>25 qazan - Respýblıka kúni merekesi elimizdiń barlyq óńirinde qoǵamdyq tártipti baqylaý kúsheıtiledi, dep habarlaıdy Kazinform.</p>

«Respýblıka kúni qoǵamdyq tártipti qamtamasyz etý úshin barlyq qajetti shara qabyldanýda. 24-26 qazan aralyǵynda jeke quramnyń qyzmeti kúsheıtilgen rejımge aýysady. Ákimdiktermen birlesip mádenı is-sharalar ótetin oryndar belgilendi», - dedi Іshki ister mınıstrligi ákimshilik polıtsııa komıteti erekshe tapsyrmalar jónindegi aǵa ınspektory Aıdyn Orazbaev mınıstrlikte ótken baspasóz máslıhatynda.

Onyń aıtýynsha, qoǵamdyq tártipti baqylaý kúshteri men quraldar daıyndaldy.

«Mereke kúni qoǵamdyq tártipti saqtaýǵa tartylǵan polıtsııa qyzmetkerleri men Ulttyq ulan qyzmetshileriniń sanyn 20 myńǵa deıin kóbeıtý kózdelgen. Adamdar kóp jınalatyn jáne demalatyn oryndarda polıtsııa jasaqtary bolady. Sonymen qatar adamdar jıi shoǵyrlanatyn oryndar jedel basqarý ortalyqtarynyń beınebaqylaý kameralary men vızýaldy baqylaýǵa alynady. Ahýaldy monıtorıng úshin jedel shtab jumys atqarady. Shtabtar barlyq óńirde ashylady», - deıdi ol.