Respýblıka kúni: Atyraýda memlekettik marapat kimderge berildi
Atyraý oblysynyń ákimi Serik Shápkenov Respýblıka kúnine arnalǵan saltanatta merekeniń mańyzyna toqtaldy.
«Elimizdiń táýelsizdigine negiz qalaǵan tarıhı qujat – memlekettik egemendiktiń deklaratsııasy 1990 jylǵy 25 qazanda qabyldandy. Demek, bul kún – barsha qazaqstandyq úshin eń mańyzdy kún. Sol sebepten, Respýblıka kúniniń mańyzyn jas býynnyń sanasyna sińirip, birlik pen kelisimdi nyǵaıtýdy, tarıhı biregeılikti qurmetteý men rýhanı murany saqtaý sekildi basty qundylyqtardy sińirýimiz qajet», -dedi Serik Shápkenov.
Elimizdiń áleýmettik-ekonomıkalyq jáne mádenı damýyna, ár salanyń órkendeýine úles qosqan 40-tan astam adamǵa memlekettik marapat tapsyryldy. Máselen, ІІІ dárejeli «Barys» ordeni «Atyraý Jaryq» AQ dırektorlar keńesi tóraǵasynyń keńesshisi Orazǵalı Qarshegenovke, «Parasat» ordeni eńbek ardagerleri Bısen Qýanov pen Nurpeıis Maqashovqa, NKOK kompanııasynyń basqarýshy dırektorynyń orynbasary Erlan Muqaıǵa berildi.
Ár salanyń 8 ókili «Qurmet» ordenine ıe boldy. Onyń ishinde 1 ardager, 2 dáriger, 1 oqytýshy jáne 4 basshy bar.
Al, ІІІ dárejeli «Eńbek dańqy» ordenimen «Atyraý jylý elektr ortalyǵy» AQ-nyń VI razrıadty elektr jóndeýshisi Sultan Aıtalıev pen «Atyraý munaı óńdeý zaýyty» JShS-niń aǵa operatory Nursáýle Quttybaeva marapattaldy.
Sondaı-aq, «Eren eńbegi úshin» medalin túrli salanyń 27 ókili ıelendi. Olardyń arasynda ardagerler de, basshylar men jeke kásipkerler de, asfalt tóseýshi, slesar, baspanana túpteýshisi, ekskovator operatory, mehanızator, ákimdiktiń júrgizýshisi, dáriger men muǵalim sekildi qarapaıym eńbek adamdary bar. Máselen, Parıj Olımpıadasynda dzıýdodan 5-shi oryn alǵan Ábıba Ábýjaqynovanyń bapkeri Meırambek Esmaǵambetov te osy medalǵa ıe boldy.
Sondaı-aq, 2 adamǵa «Shapaǵat» medali tabystaldy.
Eske sala ketelik, budan buryn Atyraýdyń Reseımen shekaralas aýdanynda apatty úı turǵyndary jańa baspanaǵa kóshkenin jazǵan edik.