Respýblıka boıynsha shyǵarylǵan barlyq sot aktileriniń 98,6 paıyzy zańdy ári negizdi dep tanyldy - Q. Mámı

ASTANA. QazAqparat - Respýblıka boıynsha shyǵarylǵan barlyq sot aktileriniń 98,6 paıyzy zańdy ári negizdi dep tanyldy. Búgin QR Joǵarǵy Sotynda respýblıka sottarynyń 2015 jyldyń birinshi jartyjyldyǵynda atqarǵan jumys qorytyndylaryna arnalǵan keńeıtilgen keńeste QR Joǵarǵy Sotynyń Tóraǵasy Qaırat Mámı osylaı málim etti.

«Ótken jartyjyldyq boıynsha respýblıkadaǵy sot tóreligin júzege asyrýdyń qorytyndylary sot tóreliginiń sapasy men isterdi qaraý merzimderin turaqty saqtalýy qamtamasyz etilgenin kórsetip otyr. Máselen, respýblıka boıynsha shyǵarylǵan barlyq sot aktileriniń 98,6 paıyzy zańdy ári negizdi dep tanyldy. Іsterdi qaraý merzimderiniń buzylýlaryna jol berilgen joq. Elimizdiń sot korpýsynyń quzyrettiligi men kásibıligin táýelsiz áleýmettik zertteýler de dáleldep otyr», - dedi Qaırat Mámı.

Sonymen qatar, Joǵarǵy Sot Tóraǵasynyń aıtýynsha, tutastaı alǵanda sot júıesinde sońǵy ýaqytta aýqymdy sharalar qamtamasyz etilýde. «Degenmen, ótken jyldardaǵy olqylyqtardyń ornyn toltyratyn ýaqyt jetti. Elektrondyq klassıfıkatordy engizý barysynda birqatar máseleler boıynsha problemalar bar ekeni de belgili boldy. Jekelegen sottarda kóptegen is sanattary boıynsha birkelki sot praktıkasynyń qalyptaspaı otyrǵany týraly syndardyń oryndy bolǵanyn da moıyndaýǵa tıispiz», - dedi Q. Mámı.