Respublica partııasynyń teń tóraǵasy Syrymbek Taý saılaýǵa qatyspaıtyn boldy
Bul jaıynda partııa lıderi Aıdarbek Hojanazarovtyń áleýmettik jelidegi jazbasynan belgili boldy.
«Búgin Ortalyq saılaý komıssııasy bıýrokratııalyq kidiristerge baılanysty meniń dosym, naǵyz patrıot, Respublica partııasynyń teń tóraǵasy Syrymbek Taýdy Məjilis saılaýynan resmı túrde shettetti. Bálkim, formaldylyq mańyzdy shyǵar, biraq ol óte laıyq kandıdat boldy. Syrymbektiń Qazaqstan halqyna degen shynaıy mahabbatyn árkez baıqaımyz. Pandemııa kezinde onyń kompanııasy Almatydaǵy 9800 otbasyna azyq-túlik kómegin kórsetti, «Biz birgemiz» jáne «Shuǵyla» qaıyrymdylyq qorlaryna qarjy bóldi. Sondaı-aq, «Taý shańyraq» qaıyrymdylyq qorynyń quryltaıshylarynyń biri, Talǵar qalasyndaǵy balalardy ońaltý ortalyǵynyń qurylysyna qarjy bólip, Arys qalasy men Maqtaaral aýdanynyń sý tasqynynan zardap shekken 100 turǵynyna kómek kórsetti. Syrymbek nólden bastap jeke kásibin kóterip, 600 jumys ornyn ashty, memleket bıýdjetine 10 mıllıard teńgeden astam salyq tóledi», - dep jazdy partııa tóraǵasy Aıdarbek Hojanazarov.
Onyń aıtýynsha, partııa qol qýsyryp qarap otyrmaıdy.
«Biraq men basa aıtaıyn, Respublica partııasy eshbir jaǵdaıda berilmeıdi, biz kúresti ári qaraı jalǵastyramyz. Mundaı oqıǵalar bizdi tek qana shynyqtyrady, qaıraıdy jáne Syrymbek sııaqty laıyqty tulǵalarǵa jol árqashan ashyq bolatyn naǵyz Jańa Qazaqstandy qurýǵa yntalandyrady», - deıdi partııa kóshbasshysy.
Foto: instagram.com/syrymbek_tau