Respublica partııasy: Qazaqstan ekonomıkasynyń kirisinen shyǵyny kóp

ASTANA. QazAqparat – KTK telearnasynda ótip jatqan saılaýaldy pikirsaıys barysynda Respublica partııasynyń teń tóraǵasy Dınara Shúkijanova qazaqstandyqtardyń jaǵdaıyn jaqsartý úshin partııa ne usynatynyn aıtty, dep habarlaıdy QazAqparat tilshisi.

«Biz, Respublica partııasy ekonomıkalyq ózgeristerdiń túpki nátıjesi - qazaqstandyqtardyń ál-aýqatyn jaqsartý ekenin naqty túsinemiz. Sizderge qarapaıym ǵana mysal keltireıin, 2023 jyly Qazaqstannyń kiris bóligi - 17 trln teńge, al shyǵys bóligi - 21 trln teńge. Demek, 2023 jyly memlekettik bıýdjettiń tapshylyǵy 4 trln teńge bolady. Eger memleketimiz kásiporyn bolsa, onda bul kásiporyn bankrotqa ushyrar edi. Qandaı salany ári qalaı damytýdy qalaǵanymyz mańyzdy emes. Oǵan aqsha joq. Muny bıznes ustanymy turǵysynan aıtyp otyrmyn. Respublica partııasy – ekonomıkanyń shynaıy sektorynda jumys isteıtin bıznesmender», - dedi partııanyń teń tóraǵasy.

Dınara Shúkijanovanyń atap ótýinshe, sońǵy 10 jylda qazaqstandyqtar pandemııany, devalvatsııany, sanktsııany bastan keshirdi jáne kún saıyn shynaıy ekonomıka jaǵdaıynda jumys istep jatyr.

«Biz basqasha ádis usynǵymyz keledi. Biz ekonomıkanyń, Qazaqstan ekonomıkasynyń kiristi bolǵanyn qalaımyz. Sol ýaqytta kez kelgen qarajatty densaýlyq saqtaýǵa, bilimge jáne ózge de salalardy damytýǵa jumsaýǵa bolar edi. Qazirgi sátte bárimiz de 30 jyldan keıin álemniń joǵalyp ketpeıtinin jaqsy bilemiz. Múmkin, zalda otyrǵan kópshilikke bul qyzyq emes te shyǵar. Biraq, meni bul tolǵandyrady. 30 jyldan keıin qyzym qazirgi meniń jasyma keledi. Onyń qalaı bilim alatyny, qaıda jumys isteıtini jáne qalaı emdeletini óte mańyzdy. Biz ınfraqurylymdy damytýymyz qajet. Shıkizattyq baǵyttan óńdeýge bet burýymyz kerek», - dedi ol.

Buǵan deıin habarlaǵanymyzdaı, KTK telearnasynyń tikeleı efırinde Parlament Májilisi saılaýyna qatysatyn 7 saıası partııa ókilderi arasynda pikirsaıys ótip jatyr.

Debatqa «Amanat» partııasynan Aıdos Sarym, «Aýyl» halyqtyq demokratııalyq partııasynan Jıgýlı Daırabaev, «Respublica» partııasynan Dınara Shúkijanova, Qazaqstan halyq partııasynan Ermuhamet Ertisbaev, «Baıtaq» jasyldar partııasynan Aınur Sábıtova, «Aq jol» demokratııalyq partııasynan Dánııa Espaeva, al Jalpyulttyq sotsıal-demokratııalyq partııasynan Ashat Rahymjanov qatysýda.