Resmı saıttarǵa monıtorıng júrgiziledi
«Elimiz boıynsha 890 ınternet-resýrs bar eken. Bizdiń maqsatymyz – sol jerdegi memlekettik tildiń qoldanylý aıasyn anyqtaý, jaqsy tájirıbeni qoldap, kemshilikter bolsa, olardy joıýdyń jolyn birlesip qarastyrý. Monıtorıng júrgizý tujyrymdamasyna sáıkes, bul baǵyttaǵy talaptardy kúsheıtemiz. Bıylǵy bir erekshelik - qoldanystaǵy zańdardyń keıbir normalaryna negizdelgen monıtorıng júrgizýdiń baǵalaý krıterııi ázirlendi, endi tekserýler osy boıynsha júrgiziledi. Jetkiliksiz nátıje kórsetip, tómen táýekeldik deńgeıine jatqyzylǵandardyń kelesi jyly qaıta tekserilýi qarastyrylǵan»
, - dedi QR Bilim jáne ǵylym mınıstrligi Til saıasaty komıtetiniń tóraǵasy Ádilbek Qaba.
Atalǵan krıterııler saıtta qazaq tilindegi kontenttiń berilý kólemi, ıaǵnı úles salmaǵy kóp bolýyn kózdeıdi. Memlekettik til mártebesiniń asqaq bolýyna úles qosyp, tekserý qorytyndysy boıynsha joǵary ball jınaǵandar kelesi jyly monıtorıngten bosatylady.
«Qazir jergilikti atqarýshy organdardyń jekelegen basqarmalarynyń, polıtsııa departamentteriniń, ulttyq kompanııalardyń (aktsıonerlik qoǵamdardyń), ekinshi deńgeıdegi bankterdiń, áýe kompanııalary men áýejaılardyń, qoǵamdyq tutyný servısteriniń resmı saıttary, mobıldik qosymshalary qaralyp jatyr. Bular – halyqpen tyǵyz qarym-qatynasta jumys jasaıtyn salalar, ıaǵnı olardyń árbir saıty qazaq tilinde sóılegen saıyn ana tilimiz kúndelikti turmysymyzdyń tórinde saltanat qurady degen sóz», - deıdi uıymdastyrýshylar.
Sh. Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵy Aqparattyq tehnologııalar basqarmasynyń basshysy Móldir Baqytqyzynyń aıtýynsha, monıtorıngtiń qorytyndysy boıynsha taldaýlar men usynymdardan turatyn elektrondy jınaq shyǵarylyp, qatysqan mekemelerge joldanady.
Al, búgin elordadaǵy kórmege barǵan Bilim jáne ǵylym mınıstri Ashat Aımaǵambetov qazaq tilindegi kitaptardyń kóbeıgeni qýantatynyn aıtqan edi.