Reseımen shekaradaǵy «Qurmanǵazy» beketinde júk kólikteri kezekte tur
Atyraý óńirlik kommýnıkatsııalar qyzmetiniń málimetine súıensek, buǵan kólik aǵynynyń artýy sebep bolǵan.
«Eki el shakarasyndaǵy «Qurmanǵazy» avtomobıl ótkizý beketindegi kólik keptelisi «Atyraý-Astrahan» tas jolymen qatynaıtyn júk kólikteriniń kóbeıýinen týyndaǵan. Ótken jyldyń 10 aıymen salystyrǵanda bıyl shekaradan ótken kólik sany 30 paıyzǵa artqan. Al, sońǵy bir aptadaǵy kólik aǵyny 6 paıyzǵa kóbeıgen. Muny mamandar «Atyraý-Astrahan» tas jolyn jańǵyrtý jumysynyń aıaqtalýymen baılanysty bolyp otyr», -dep habarlady óńirlik kommýnıkatsııalar qyzmeti.
Al, Atyraý oblystyq memlekettik kirister departamentiniń aqparatyna qaraǵanda, bıyl 9 qyrkúıekten Qazaqstan Respýblıkasynyń aýmaǵynan avtomobıl ótkizý beketteri arqyly shyǵýdy josparlaǵan júk tasymaldaýshylar «CarGoRuqsat» elektrondyq kezek júıesi arqyly talon alýy qajet. Elektrondy kezek júıesi «Qurmanǵazy» beketinde de iske qosylǵan. Kezek alý úshin júıeniń 18 talabyna sáıkes bolýy kerek. Onyń ishinde salyqqa, aıyppulǵa, aqyly joldan ótkeni úshin qaryzdyń joqtyǵyn, halyqaralyq tasymaldaýǵa ruqsat qaǵazy (KAT), saqtandyrý polısi, kedendik rásimdeýden jáne tehnıkalyq baıqaýdan ótkenin rastaıtyn qujat bar. Kedendik baqylaýdaǵy jumysty jedeltý úshin ótkizý beketinde jumys isteıtin mamandardyń sany 10-nan 13 birlikke jetken.
Ótkizý beketinde kásipkerlikke qatysty barlyq úderis ınternet arqyly júzege asyrylady. Munda tólemderdi onlaın jasaýǵa bolady. Alaıda, beket mańynda bank bólimsheleri men aqsha aıyrbastaıtyn arnaıy oryn joq. Osyǵan oraı shekaradaǵy ınternet jyldamdyǵyn arttyrý maqsatynda birqatar jumys qolǵa alynǵan. Qujat qabyldaý jáne elektrondy kezekti naqtylaý ornynda keptelis joq. Bekette qujattardy qabyldaý úshin 2 tereze ashylǵan.
Eske sala ketelik, buǵan deıin Atyraýdan Aqtaýǵa ushatyn áýe reısiniń keshigýine ne sebep bolǵanyn jazǵan edik.