Reseımen shekarada uzyn-sonar kezek: Memlekettik kirister komıteti bul aqparatty joqqa shyǵardy

<p>ASTANA.KAZINFORM - QR Qarjy mınıstrliginiń Memlekettik kirister komıteti qazirgi tańda &laquo;Jaısań&raquo; ótkizý beketinde júk kólikteriniń keptelisi joq ekenin habarlady.</p>

Buǵan deıin buqaralyq aqparat quraldarynda Aqtóbe oblysyndaǵy «Jaısań» beketiniń aldynda júk kólikteriniń birneshe shaqyrymdyq kezegi qalyptasqany týraly aqparat taraǵan bolatyn.

— Osyǵan baılanysty Memlekettik kirister komıteti qazirgi ýaqytta «Jaısań» ótkizý beketinde júk kólikteri keptelisiniń joqtyǵyn, baqylaý-ótkizý beketiniń qalypty rejımde jumys istep jatqanyn habarlaıdy. Táýlik ishinde Reseı Federatsııasynyń shekarasynan ótý úshin kezekte turǵan júk kólikteriniń sany 50 kólikten aspaıdy, - delingen vedomstvo habarlamasynda.

«Jaısań» beketinen kúnine orta eseppen 1,6 myńnan astam júk jáne jeńil kólik ótedi.
Sondaı-aq, Komıtet shekaranyń Qazaqstan jaǵyndaǵy ótkizý beketinde ár baǵytta tórt jol syzyǵy, Reseı jaǵynan «Saǵarchın» ótkizý beketinde bir jolaq bar ekenin atap ótti.

- Memlekettik kirister organdary tarapynan jumys ádettegideı júrgizilip jatyr, baqylaý-ótkizý pýnktinde barlyq qujatty tirkeý terezeleriniń jumysyn qamtamasyz etetin 4 qyzmetker jumys isteıdi, ótkizý pýnkti ishinde júrgizýshiler men avtokólikterdiń kezegi joq, - delingen habarlamada.