Reseımen seriktestik sý resýrstaryn tıimdi paıdalanýǵa qatysty teńgerimdi tásildiń kepili bolady – Prezıdent

<p>Reseımen strategııalyq seriktestik qarym-qatynasymyz sý resýrstaryn tıimdi paıdalanýǵa qatysty teńgerimdi tásildiń kepili bolady. Bul týraly Qazaqstan men Reseıdiń XIX Óńiraralyq yntymaqtastyq forýmynda Memleket basshysy Qasym-Jomart Toqaev aıtty, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

«Ekonomıkamyzdyń negizgi salalarynda, ásirese, aýyl sharýashylyǵynda sýdyń kóp mólsherde paıdalanylýy jaǵdaıdy odan saıyn kúrdelendire tústi. Sarapshylardyń boljamynsha, 2050 jylǵa qaraı Ortalyq Azııadaǵy qurǵaqshylyq pen sý tasqyny ónimdilikti 30 paıyzǵa deıin tómendetýi múmkin. Bizdiń agrarlyq sektor 60 paıyzdan astam sý tutynady jáne sý únemdeıtin tehnologııalardy jappaı engizýdi talap etedi. Bul barynsha ózekti mindet. Osynaý syn-tegeýirinderge jaýap bertinde sý sektoryn jańǵyrtýǵa kiristik. Jańadan 20 sý qoımasyn salyp, kem degende 15 sý qoımasyn rekonstrýktsııalaý, sondaı-aq 3500 shaqyrymnan astam kanaldy jańǵyrtý jáne tsıfrlandyrý josparlanyp otyr. Bul sharalar 2027 jylǵa qaraı qosymsha 2 tekshe kılometrge jýyq sýmen qamtamasyz etýge múmkindik beredi», - dedi Qasym-Jomart Toqaev.

Memleket basshysy Qazaqstanda jańa Sý kodeksi ázirlenip jatqanyn aıtty.

«Bul qujat sý resýrstarynyń tapshylyǵyn azaıtýǵa baǵyttalǵan. Reseımen birge Jaıyq, Ertis sekildi iri ózenderdiń basseıinderinde zertteý júrgizý jónindegi yntymaqtastyqty jandandyrý úshin Biryńǵaı jol kartasy júzege asyrylyp jatyr. Mundaı kúrdeli problemany sheshýge bir ǵana eldiń kúsh-jigeri jetpeıdi. Bul máseleni múddeler teńgerimin saqtap, birlese áreket etý arqyly sheshý qajet. Osy múmkindikti paıdalana otyryp, bizdiń Reseımen strategııalyq seriktestik qarym-qatynasymyz eki el halyqtarynyń múddesi jolynda sý resýrstaryn birlese tıimdi paıdalanýǵa qatysty teńgerimdi tásildiń kepili bolatynyna senimdimin», – dedi Qasym-Jomart Toqaev.