Reseımen baılanysymyz keńestik oqýlyqtarda jazylǵannan áldeqaıda tereń – Dáýren Abaev

NUR-SULTAN. QazAqparat – Altyn Orda – ótken tarıhymyz ǵana emes, ol eń aldymen, búginimiz ben bolashaǵymyz. Prezıdent ákimshiligi jetekshisiniń birinshi orynbasary Dáýren Abaev Ulttyq akademııalyq kitaphanada ótken halyqaralyq konferentsııada osyndaı pikir bildirdi, dep habarlaıdy QazAqparat tilshisi.

«Bizdiń kórshiles Reseımen ekijaqty baılanysymyzdyń tarıhy keńestik oqýlyqtarda jazylǵan kezeńnen góri tym tereń ekenin aıtqym keledi. Ol, keminde, XIII ǵasyrda Joshy Ulysy atty ımperııalyq memlekettiń aıasynda bastalǵan», - dedi ol «Ulyq Ulys - Altyn Orda: bastaýy, tarıhy jáne murasy» atty halyqaralyq ǵylymı-tájirıbelik konferentsııada.

Prezıdent Ákimshiliginiń ókili Eýrazııa keńistigindegi memleketterge Altyn Orda órkenıetinen qandaı mura qalǵanyna da toqtaldy.

«Birinshi – ortalyqtan basqarylatyn memleket. Ulyq Ulystyń tarıhı tájirıbesi osyny kórsetkendeı, tabıǵaty qatal, aýmaǵy úlken Eýrazııa qurlyǵynyń keńistiginde myqty «bılik vertıkali» arqyly ortalyqtan basqarylatyn memleket qana ósip-órkendeıdi. Osy mańyzdy shart Joshy Ulysynyń «Altyn ǵasyryn» týǵyzdy.

Ekinshi – merıtokratııa. Altyn Orda memleketi men qoǵamynyń mańyzdy ereksheliginiń biri – adamdardy elıta qataryna jeke qasıetine qarap qosty. Qarym-qabiletiniń arqasynda qarapaıym jigitten áýeli batyr, odan soń bı, keıinnen Altyn Ordanyń beklerbegine aınalǵan Edigeniń ǵumyry osyǵan anyq dálel. Búginde memleketimiz merıtokratııanyń basty qaǵıdasyn júzege asyryp jatyr. Onsyz qoǵamnyń jańǵyrýy men damýy múmkin emes», - dedi Dáýren Abaev.