Reseılikter kólikti jappaı satyp alyp jatyr degen áńgime shyndyqqa janaspaıdy – mınıstr

ASTANA. QazAqparat – QR Indýstrııa jáne ınfraqurylymdyq damý mınıstri Qaıyrbek Óskenbaev otandyq avtoónerkásip naryǵyndaǵy tapshylyq jónindegi suraqqa jaýap berdi, dep habarlaıdy QazAqparat tilshisi.

Búgin Ortalyq kommýnıkatsııalar qyzmetinde tilshiler mınıstrden Qazaqstandaǵy avtokólikterdi Reseı men basqa da elderge shyǵarý naryǵyn qadaǵalaý múmkindigine qatysty suraq qoıyldy.

«Ekonomıka zańdylyǵy boıynsha barsha álem ónimdi ótkizý naryǵy úshin básekege túsedi. Ónimdi neǵurlym kóbirek satsaq, bul sala jyldamyraq damı túsedi. Osy oraıda jańa jumys oryndary qurylady. Reseılikter bizdiń kólikterdi jappaı satyp alyp jatqany jóninde sonshalyqty dúrbeleńdi kórip turǵanymyz joq. Bul turǵyda Qazaqstan azamattary kólikterdi satyp alyp, keıinnen ony qaıta ótkizip jatqany týraly aqparat túsip jatyr», - dedi Q. Óskenbaev.

Onyń aıtýynsha, jeńildetilgen paıyzy tómen nesıe berý baǵdarlamasy boıynsha satyp alynǵan avtokólikter shetelge shyǵarylmaýy kerek. Ol úshin memleket naqty el turǵyndaryna bastapqy jarnasyz satyp alýyna múmkindik jasady.

Sonymen qatar mınıstr memlekettik baǵdarlamadan tys ótkizilip jatqan kólikter boıynsha óndiris kólemin arttyrý mańyzdy ekenin aıtty.

«Bizdiń mashınalar álemniń barlyq eline ótkizilýin yntalandyrýymyz kerek. Biz únemi problemany májbúrli túrde sheshý joldaryn izdep jatamyz. ıAǵnı belgili bir shekteýledi engizý usynystary jasalyp jatady. Bul saladaǵy máselelerdi ekonomıkalyq jolmen sheshý kerek. Elimizdegi avtoónerkásip óndirisin kúsheıtýge mán bergen jón», - dedi vedomstvo basshysy.

Onyń sózine qaraǵanda, taıaý kúnderi taǵy úsh-tórt zaýyttyń qurylysy bastalady. Bul rette avtokólik bólshekterin elimizde shyǵarýǵa ekpin qoıylyp otyr.