Reseılik volonter jastar Memleket basshysyna usynys jasady
Buǵan deıin habarlaǵanymyzdaı, Memleket basshysy Qasym-Jomart Toqaev Qostanaı oblysyna jumys sapary barysynda Qazaqstan-Reseı jastarynyń halyqaralyq forýmyna qatysty.
Al Reseı Federatsııasy eriktiler ortalyqtary qaýymdastyǵy keńesiniń tóraǵasy Artem Metelev atalmysh forýmǵa arnaıy usynyspen kelgenin aıtty.
«Reseıde óziniń irgeli jobalarymen tanylǵan volonterler toptary bar. Biz olardy bir qaýymdastyqqa jınadyq. Olardyń kóbi Qostanaıǵa kelip, tájirıbesimen bólisti. Mysaly, bizdegi «Erikti dárigerler» toby medıtsınalyq personalǵa edáýir kómekterin tıgizip júr. Olar endi Qazaqstannyń medıtsınalyq uıymdarymen memorandýmǵa qol qoıýǵa nıetti. Taǵy sondaı ilkimdi jobalardyń biri - «Menimen birge armanda». Munda jastar qaýipti aýrýǵa shaldyqqan jandarǵa kómek qolyn sozady. Mine, osyndaı bastamalardy Qazaqstanda jasaǵymyz keledi. Eki eldiń eriktileri tájirıbe almasyp, ortaq jobalarǵa jumylsaq, volonterlyq salasyn damytýǵa úles qosamyz. Qazaqstan tarapynan qoldaý bolsa, baǵdarlamalarymyz daıyn», - dedi Artem Metelev Memleket basshysyna usynys bildirip.
Prezıdent Qasym-Jomart Toqaev elimizdiń ozyq oıly jastary ǵylymda, ІT-tehnologııada, mádenıet, bıznes jáne sport salasynda jaqsy nátıjelerge qol jetkizip júrgenin atap ótti. Sonymen qatar, eriktiler tobynyń jobalaryn qoldaıtynyn jetkizdi.
Aıta ketsek, Qazaqstan men Reseı jastarynyń forýmy barysynda «Ulttyq eriktiler jelisi» uıymynyń tóraıymy Vera Kım 2020 jyldy Eriktiler jyly dep jarııalaýdy usyndy. Onyń aıtýynsha, elde 200-den astam eriktiler uıymy tirkelgen.