Reseılik vırýsolog úndi shtamyn juqtyrǵandar arasyndaǵy jańa sımptom týraly aıtty

MÁSKEÝ. TASS-QazAqparat – Iis jáne dám sezý qabiletteriniń buzylýy koronavırýstyń delta nusqasyn juqtyrǵan naýqastardyń azynda ǵana baıqalady. Naýqastarda kóbine asqazan-ishek aýrýlarynyń belgileri anyqtalǵan. Bul týraly reseılik vırýsolog, Novosibir memlekettik ýnıversıtetiniń (NMÝ) bıotehnologııa, mıkrobıologııa jáne vırýsologııa zerthanasynyń meńgerýshisi Sergeı Netesov aıtty, dep habarlaıdy QazAqparat TASS agenttigine silteme jasap.

«Bir sımptomdardyń úlesi kóterilip, basqa sımptomdardyń úlesi azaıýda. Delta nusqasyn juqtyrǵan naýqastar arasynda ıis jáne dám sezý qabiletiniń buzylýy az baıqalady, alaıda asqazan-ishek aýrýlarynyń belgileri kóbirek kezdese bastady», - dedi vırýsolog shtamnyń jańa sımptomdary týraly qoıylǵan suraqqa jaýap retinde.

Netesovtiń aıtýynsha, bul S aqýyzynyń retseptorlyq baılanystyrýshy domeniniń qurylymynyń ózgerýinen bolyp otyr. Soǵan sáıkes, onyń jasýshalarǵa áser etý ereksheligi de ózgeriske túsken. «Baıqaýymyzsha, olar bir-birimen tyǵyz baılanysta. Mundaı jasýshalar ókpede de, qan tamyrlarynyń qabyrǵalarynda da, ishekte de kezdesedi. Sımptomdardyń aýysýy osyǵan baılanysty bolýy ábden múmkin», - dep qosty ol.

Vırýsolog delta shtamynyń aǵzada tez kóbeıetini buǵan dálel bola alatynyn atap ótti. «Buny kóp elderdiń koronavırýs boıynsha derekteri rastaı alady. Sol sebepti de vaktsınalaý qarqyny joǵary elder de zardap shegýde», - dep túsindirdi Netesov.

Eske salsaq, pandemııa bastalǵannan beri álem boıynsha 190,1 mln adam koronavırýs juqtyryp, odan 4 mln-nan astamy kóz jumdy.