Reseılik shabandoz Qostanaıdaǵy alaman báıgeni utty
Oblys ortalyǵyndaǵy Naýryz toıy irgeles Zarechnyı aýylyndaǵy «Arǵymaq» ıppodromyndaǵy ulttyq sport oıyndarymen jalǵasty. Aldymen, oblys ortalyǵynyń turǵyndary men qonaqtaryn aımaq basshysy Arhımed Muhambetov quttyqtady.
«Dál osy kúni adamdar bir-birmen kórisip, aradaǵy ókpe-nazyn umytqan, izgi tilekter aıtylyp, úlkenniń batasyn alǵan. Naýryz merekesi Táýelsizdiktiń arqasynda halqymyzben qaıta qaýyshty. Bul tek kóktemniń ǵana emes, eń áýeli izgilik pen yrystyń, tatýlyq pen birliktiń merekesi. Tar jerde tabystyryp, keń jerde kelistire bilgen eldegi dostyqtyń belgisi. Búginde Qazaqstan álemdik qaýymdastyqta etnos pen konfessııaaralyq kelisimniń úlgisi retinde tanylǵan memleket. Sondyqtan osynaý Ulystyń uly kúninde tatýlyǵymyz odan saıyn nyǵaıyp, murat tutqan barlyq ıgi bastamalarymyz ońynan oryndalsy»! - dedi oblys basshysy.
Ákim sózinen keıin jergilikti ónerpazdar shaǵyn kontserttik baǵdarlama usyndy.
Jıylǵan jurt qyz qýý men aýdaryspaq oıynyn da tamashalady.
Bilektiler úshin qoıdy moıynǵa salyp kóterýden jarys uıymdastyryldy. 80 kelige deıingi qatysýshylar arasynan Vıktor Tsırık ozdy. Ol qoıdy 2 mınýtta 52 ret kóterdi. Al aýyr salmaqta synǵa túskenderdiń syılyǵyn Anatolıı Mýlın oljalady. Anatolıı qoıdy 71 ret ıyǵynan asyrdy.
«Men Naýryz toıynda ótetin sport sharalaryna birinshi ret qatysyp otyrmyn. Qoıdy ıyqqa salyp kóterý sporty ózime qatty unady. Munda tek kúsh qana emes, aıla-tásilder de kerek. Ortaq meıramymyz Naýryzda osyndaı ulttyq sport oıyndarynyń qatary kóbeıse degen tilek bar», - deıdi Anatolıı Mýlın.
Báıge dese, delebesi qozbaıtyn qazaq bar ma?! Báıgege respýblıkanyń túkpir-túkpirinen jáne Reseıden tulparlar jınaldy. Áýeli, 3 shaqyrymdyq toq báıgeniń jeńimpazdary anyqtaldy. Bir qyzyǵy, júldeli úsh oryndy Jitiqara aýdanynyń qunandary ózara bólisti. Bas báıge Ernur Qutegen esimdi shabandozdyń enshisinde ketti.
Munan soń tanaýyn kókke shanshytyp, kekilin jel taraǵan 26 kúlik alamanǵa tústi. Márege eki aınalym qalǵanda shyn sáıgúlikter alǵa sýyrylyp shyǵyp, qalǵandarynan aralary alshaqtaı bastady. Jurt kómbege bettegen júırikterdi qıqýlap qarsy alyp jatty. Sonymen, Reseıden ákelingen «ıÝmor» atty arǵymaq bas júldeni enshiledi. Onyń ıesi - Ramıl Salahov. Jitiqaralyq Hansultan Jandáýlet mingen «Toryn» tulpary máre syzyǵyn ekinshi bolyp kesti. Úzdik úshtikte - «Zarbına». Bul sáıgúlik Taran aýdanynan qatystyryldy.