Reseılik sarapshylar adamdarda úndi shtamy qalaı baıqalatynyn aıtty

MÁSKEÝ. TASS - QazAqparat – Reseılik pýlmonolog dáriger Alekseı Nıkıshenkovtiń aıtýynsha, koronavırýstyń «Delta» ataýy berilgen úndi shtamy asqazan-ishek jolynyń buzylýy túrinde baıqalýy múmkin. Sońǵy kezde kóptegen reseılikter osyndaı aýrý belgilerin aıtyp shaǵymdanýda. Bul týraly QazAqparat TASS aqparat agenttigine silteme jasap habarlaıdy.

«Ádette biz aldymyzda qandaı shtamm ekenin bilmeımiz, sebebi tájirıbemizde koronavırýs túrlerin zertteý júrgizilmeıdi. Biraq sońǵy ýaqytta, «Delta» shtamy tarala bastaǵan kezden bastap koronavırýsqa shaldyqqan patsıentterdiń asqazan-ishek jolynyń buzylýy – ish ótý, ishtiń aýyrýyna qatysty shaǵymdaryn jıi aıtatynyn atap ótkim keledi. Bul buryn bolǵan jótel, álsizdik, mıalgııaǵa qosylǵan jańa belgiler», - dedi ol.

«Delta» shtamyn juqtyryp alǵan patsıentterde «asqazan kovıdiniń» paıda bolýyn ımmýnolog dáriger Vladımır Bolıbok ta rastady.

Qazirgi kezde basyp kirgen kovıd úshin «Delta» shtamy «asqazan sındromy» nemese «asqazan kovıdi» sıpatynda. Aýrýdyń burynǵy belgilerine endi ishtiń aýyrýy, qusý jáne ishtiń ótýi jıi qosylyp otyr», - dep baıandady ol.

Bul rette vırýsolog dáriger Vıktor Larıchev óz kezeginde koronavırýstyń ýhandik shtamyn juqtyryp alǵan patsıentterden anyqtalǵan aýrý belgileri úndi shtamymen birdeı ekenine senimdi. «Aýrý belgileri ózgergen joq. Barlyq ınfektsııalyq aýrýlar kezinde birinshi kezekte dene temperatýrasy kóteriledi – buryn qandaı boldy, solaı qalǵan», - dep atap ótti ol.

Resmı túrde «Delta» ataýyn alǵan koronavırýstyń bir túri alǵash ret ótken jyldyń qazanynda Úndistanda anyqtalǵan. Buǵan deıin Búkilúndilik medıtsınalyq zertteýler ınstıtýty vırýstyń bul nusqasy adamdarǵa Úndistanda qoldanylyp júrgen Covaxin jáne Covishield vaktsınalaryn saldyrtqan soń da juǵa alatnyn málimdedi. Al bul shtamnyń «Delta plıýs» atty nusqasy odan da juqpaly.

Eske salsaq, Qazaqstannyń barlyq óńirinde úndi shtamy tabyldy.