Reseılik sarapshy kóktem sońynda koronavırýs juqtyrǵandar sany báseńdeıtinin boljady

MÁSKEÝ. TASS - QazAqparat – Rospotrebnadzor Epıdemıologııa Ortalyq ǴZI dırektorynyń orynbasary Natalıa Pshenıchnaıa aldaǵy ýaqytta koronavırýs juqtyrǵandar sany azaıýy múmkin ekendigin aıtty, dep habarlaıdy QazAqparat TASS agenttigine silteme jasap.

Onyń aıtýynsha, kóktemniń sońyna qaraı koronavırýs ınfektsııasymen aýyrý deńgeıi naýryzda baıqalyp otyrǵan statıstıkamen salystyrǵanda azaıýy múmkin. Ol úshin adamdar barlyq erejelerdi saqtap, koronavırýsqa qarsy ekpe saldyrtýy tıis.

«Qazirgi kezde bosańsymaı, qorǵanys sharalaryn saqtaý, vaktsınalaý qarqynyn ósirý mańyzdy. Mundaı jaǵdaıda kóktemniń sońynda biz aýrýǵa shaldyǵý deńgeıiniń naýryzdaǵy qazirgi kórsetkishtermen salystyrǵanda odan da tómendeýin kórýimiz ábden múmkin», - dedi ol.

Pshenıchnaıa Reseıde qazirgi kezde jaǵdaı turaqtalǵanyn atap ótti. Onyń sózinshe, COVID-19 juqtyrýdyń kún saıyn anyqtalǵan oqıǵalarynyń sany sońǵy eki aptada táýligine 11 myńnan aspaıdy. Mamannyń aıtýynsha, buǵan keńes etilgen aldyn alý sharalaryn saqtaý, vaktsınalaý naýqany, sondaı-aq turǵyndardyń bir bóliginde koronavırýsqa qarsy ımmýnıtettiń qalyptasqany septigin tıgizip otyr.

Alaıda ol kóktemde jylymyq, batpaq, jańbyr jáne ylǵaldy aýa raıynyń áserinen aýrýǵa shaldyǵýdyń táýliktik aýytqýy baıqalýy múmkin ekenin qosyp ótti.

Jyl basynan beri álemde 121,8 mln adam koronavırýs juqtyrǵan, 2,7 mln jýyq adam qaıtys boldy. Koronavırýsqa qarsy kúres júrgizý federaldyq shtabtyń málimetinshe, Reseıde aýrý juqtyrýdyń 4 437 938 oqıǵasy tirkelgen, 4 049 373 adam saýyǵyp shyqty, 94 267 adam qaıtys boldy.