Reseılik mánerlep syrǵanaýshy Sofııa Samodelkına Qazaqstan atynan óner kórsetýi múmkin

ASTANA. QazAqparat – Qazaqstan konkıshiler odaǵy belgili reseılik mánerlep syrǵanaýshynyń Qazaqstan azamattyǵyn alýyna túsinik berdi, dep habarlaıdy QazAqparat odaqtyń baspasóz qyzmetine silteme jasap.

«Bizdiń odaq reseılik mánerlep syrǵanaýshy Sofııa Samodelkınaǵa Qazaqstan quramasynda óner kórsetý jóninde ótinish jasaǵan joq. Sportshy azamattyǵyn óz erkimen aýystyrdy. Jalpy Qazaqstan azamattyǵyn berý máselesimen Іshki ister mınıstrligi aınalysady. Eger azamattyq berilgen jaǵdaıda jeke tulǵanyń teń quqyqtary men múmkindikteri bar. Sportshy ulttyq quramda óner kórsetýge ótinim berýge quqyly», - delingen resmı jaýapta.

Sonymen qatar odaq habarlamasynda búginde reseılik sportshynyń azamattyq alý máselesi qarastyrylyp jatpaǵany aıtylǵan.

Aıta ketsek, keıbir BAQ betterinde reseılik mánerlep syrǵanaýshy Sofıa Samodelkınanyń Qazaqstan azamattyǵyn alǵany týraly habar taraǵan edi.