Reseılik konkıshi Golýbeva Qazaqstan atynan jarysýǵa sheshim qabyldady

MÁSKEÝ. TASS-QazAqparat - Reseı quramasy sapynda konkımen júgirýden álem chempıonatynyń alty dúrkin qola júldegeri bolǵan Elızaveta Golýbeva Qazaqstan quramasyna aýysýǵa ótinish bildirdi. Bul týraly TASS agenttigine Reseı konkıshiler odaǵynyń prezıdenti Nıkolaı Gýlıaev málim etti, dep habarlaıdy QazAqparat.

«Bizde Golýbevanyń Qazaqstan quramasyna aýysýǵa jazǵan ótinishi bar. Qazir belgili bir bıýrokratııalyq protsedýralar júrip jatyr. Biz el ishinde de, shetelge de aýysý úshin Reseı konkıshiler odaǵynyń atqarýshy komıteti bekitken erejelerge sáıkes áreket etemiz», - dedi Gýlıaev.

Agenttik «Konkıshiniń ózge elge ketýine Reseıdiń sportshyny halyqaralyq jarystardan alastatýy sebep bolǵan joq pa?» degen suraq qoıǵan.

«Aýysý sebepterin sportshynyń ózinen suraǵan durys. Biraq, eshkimdi kúshtep, májbúrleý múmkin emes. Árkim ózi sheshedi», - dep jaýap berdi agenttikke suhbat berýshi.

Elızaveta Golýbeva 26 jasta. 2022 jyly Beıjińde ótken alǵashqy Olımpıada oıyndarynda ol 1 500 metrge júgirýde 7-shi, komandalyq jarysta 4-shi jáne mass-startta 15-oryn aldy. 2022/2023 jylǵy maýsymdaǵy mass-startta Reseı chempıonatynyń «altynyn» jeńip aldy, komandalyq jarysta ekinshi, al 1000 jáne 3000 metr qashyqtyqta úshinshi boldy.