Reseılik kompanııalardyń Qazaqstanǵa ınvestıtsııasy 17 mlrd dollardan asty - Prezıdent

MÁSKEÝ. QazAqparat – Reseılik kompanııalardyń Qazaqstanǵa salǵan ınvestıtsııa kólemi 17 mlrd dollardan asty. Bul týraly Qazaqstan Prezıdenti reseılik áriptesi Vladımır Pýtınmen ótken kezdesý qorytyndysy boıynsha buqaralyq aqparat quraldaryna jasaǵan birlesken málimdemesinde aıtty, dep habarlaıdy QazAqparat tilshisi.

«Karantın shekteýlerine qaramastan, byltyr ózara saýda-sattyqta eń joǵary nátıjelerge qol jetkizildi. Saýda kólemi 21 mlrd dollardan asty. Reseı kompanııalary Qazaqstan ekonomıkasyndaǵy jetekshi ınvestorlardyń bestigine kiredi. Olardyń jalpy salymy 17 mlrd dollardan asty. Reseı Qazaqstandaǵy sheteldik kapıtaly bar kompanııalardyń sany boıynsha kóshbasshy bolyp sanalady.

Árbir úshinshi osyndaı kompanııa reseılik kompanııalardyń qatysýymen qurylǵan. Olardyń jalpy ınvestıtsııalyq protfeli búkil salalarda kórinis tapqan. Biz óndiristik kooperatsııany keńeıtýdiń keleshegin talqyladyq. Bul baǵytta bizdiń elder 13 iri jobany aıaqtady», - dedi Prezıdent.

Aıta keteıik, Reseı Federatsııasynyń astanasynda QR Prezıdenti Qasym-Jomart Toqaev pen RF Prezıdenti Vladımır Pýtın kelissóz júrgizdi.

Memleket basshysynyń Reseıge jumys sapary aıasynda birqatar qujatqa qol qoıyldy.