Reseılik kásipker: Qazaqstanda tsıfrlandyrý deńgeıi joǵary

ASTANA. QazAqparat – Reseıdiń «RTVI Novostı» saıtyna suhbat bergen reseılik kásipker, ınvestor Sergeı Grıshın Qazaqstanda bıznes júrgizýdiń tıimdiligine qatysty pikir bildirdi, dep habarlaıdy QazAqparat tilshisi.

«Men 10-11 jyl kóleminde Qazaqstanda jumys istedim. Qazaqtar qarapaıym, sabyrly halyq. Men ol jaqta óziminiń biletinimnen de kóp dúnıeni úırendim», dedi Grıshın suhbat barysynda. Sonymen qatar, reseılik kásipker Qazaqstanda tsıfrlandyrý deńgeıiniń myqty damyǵanyn atap ótti.

«Rasynda da, Qazaqstanda tsıfrlandyrý joǵary, ol óte keremet el. Qazir onda saqtandyrý kompanııasy jumys isteıdi. Men onyń dırektorlar keńesiniń múshesimin. Kompanııa arqyly kólikke saqtandyrýdy satyp alýǵa bolady. Ol úshin tek avtokóliktiń nómiri men JSN (jeke sáıkestendirý nómiri) bolsa jetkilikti. Keıin seniń poshtańa saqtandyrý qujaty joldanady, tıisinshe sen kólik tizgindeı bere alasyń. Qazir meniń telefonymda qazaqstandyq temir tulpardy júrgizýge qajetti kýálik pen qujattar bar. Munyń barlyǵy meniń uıaly telefonymda tur. Men ony kez kelgen ýaqytta patrýldik polıtsııaǵa kórsete alamyn», - dep pikir bildirdi reseılik kásipker Sergeı Grıshın.