Reseılik ǵalym maımyl sheshegi vırýsynyń tasymaldaýshysy kemirgishter bolýy múmkin ekenin aıtty

MÁSKEÝ. QazAqparat – Maımyl sheshek vırýsynyń negizgi tasymaldaýshysy prımattar emes, kemirgishter bolýy múmkin. Bul nusqany Gamaleı atyndaǵy ortalyq dırektory Aleksandr Gıntsbýrg «Rossııa-1» telearnasyna bergen suhbatynda aıtty, dep habarlaıdy QazAqparat menshikti tilshisi.

«Maımyldar ózderi zııan shekken bul dertti tyshqan, egeýquıryq sııaqty kemirgishterden juqtyryp alýy múmkin», - dep málimdedi A.Gıntsbýrg.

Sondaı-aq, ol adamnan adamǵa jappaı juǵý jaǵdaıynda joǵary vırýlenttiligi bar maımyl sheshek vırýsynyń nusqalary paıda bolýy yqtımal dep boljady.

«Eger ol adamnan adamǵa jappaı juǵa bastasa, joǵary vırýlenttiligi bar nusqalar paıda bolýy múmkin. Ol kezde epıdemıologııalyq jáne klınıkalyq turǵydan óte qaýipti bolady», - dedi ol.

Ótken beısenbide «Rospotrebnadzor» basshysy Anna Popova Reseıge maımyl shesheginiń kelý qaýpi az ekenin aıtty. Osyǵan qaramastan, gıgıena erejelerin jáne tıisti saqtyq sharalaryn saqtaý usynylady: qoldy jıi jýý, qoǵamdyq jerde, ásirese aýrý anyqtalǵan elderde maska taǵý.

Telearnanyń habarlaýynsha, Reseıdiń «Vektor» vırýsologııa jáne bıotehnologııa ǵylymı ortalyǵynyń qyzmetkerleri maımyl shesheginiń vırýsyn zertteı bastaǵan.