Reseılik dáriger: kovıdten keıingi sındromnan saqtaný joly – fızıkalyq belsendilik
«Mentaldy densaýlyq jáne COVID-19» taqyrybyndaǵy konferentsııa aıasynda «V.M. Behterev atyndaǵy Ulttyq medıtsınalyq psıhıatrııa jáne nevrologııa zertteý ortalyǵynyń» dırektory Nıkolaı Neznanov mentaldy densaýlyqty qalaı saqtaý kerektigi týraly aıtty.
Dárigerdiń málimetinshe, onyń ádisteri óte qarapaıym. Biraq adamdar olardy saqtaýǵa tyryspaıdy. Sarapshy eń aldymen, óz densaýlyǵy úshin jeke jaýapkershilik alýǵa, ózin-ózi baqylaýǵa, tek asqynýlarmen ǵana emes, sonymen qatar aldyn alý úshin dárigerlerge ýaqtyly barýǵa shaqyrady.
«Bir ǵana usynys – eńbek jáne demalys rejımin qalypqa keltirý. Jaqsy fızıkalyq belsendilik – osyny esten shyǵarmaý qajet. Fızıkalyq turǵydan ǵana emes, psıhologııalyq turǵydan da ol óziniń stress júktemesine daıyn bolýy qajet. Biraq biz sizdermen kerisinshe, álsireımiz, qozǵalýdy toqtatamyz. Tórt qabyrǵadan shyǵyp, kólikke otyryp úıge jetemiz, 50 metr júremiz, sonymen boldy, barlyq fızıkalyq belsendiligimiz shekteýli. Ekinshi faktor – durys tamaqtaný. Bul – uzaq ómir súrýdi qamtamasyz etetin faktorlar», - dedi N.Neznanov.
Ol sonymen qatar fızıkalyq densaýlyqqa nazar aýdarý kerektigin atap ótti. Óıtkeni, kóptegen psıhologııalyq problemalar tap osy buzylýlardan bastaý alady.
«Kez kelgen somatıkalyq aýrý, eger ol sol tusta ózekti sıpatqa ıe bolsa, tanymdyq tapshylyqqa ákeledi. Mundaı buzylýlardyń yqtımal sebebi ne ekenin naýqastarǵa jetkizý mańyzdy», - dedi zertteý ortalyǵynyń dırektory.