Reseılik belgili jýrnalıst Mıhaıl Gýsman «Dostyq» ordenimen marapattaldy

MÁSKEÝ. QazAqparat - Máskeýde Qazaqstannyń Reseıdegi Elshisi Ermek Kósherbaev TASS Aqparattyq agenttigi bas dırektorynyń birinshi orynbasary Mıhaıl Gýsmanǵa 2-dárejeli «Dostyq» ordenin tapsyrdy, dep habarlaıdy QazAqparat Qazaqstannyń Reseıdegi Elshiligine silteme jasap.

Memleket basshysy Qasym-Jomart Toqaevtyń Jarlyǵyna sáıkes reseılik jýrnalıst «Qazaqstan Respýblıkasy men Reseı Federatsııasy arasyndaǵy qatynastardy damytýǵa qosqan úlesi úshin» joǵary marapatpen marapattaldy.

Mıhaıl Gýsman joǵary nagrada úshin Qazaqstan Respýblıkasynyń basshylyǵyna rızashylyǵyn bildirip, óziniń áriptesterimen birge eki el arasyndaǵy aqparattyq saladaǵy yntymaqtastyqty damytý jáne nyǵaıtý úshin qoldan kelgenniń bárin jasaıtynyna sendirdi. Sonymen qatar ol qazaqstandyqtardy kele jatqan Naýryz Meıramy merekesimen quttyqtap, elge tynyshtyq pen baq-bereke tiledi.

«Dostyq» ordeni – qoǵamdaǵy ózara kelisimdi saqtaý jónindegi jemisti jumysy, halyqtar arasyndaǵy beıbitshilikti, dostyq pen yntymaqtastyqty nyǵaıtýǵa sińirgen eńbegi úshin beriletin Qazaqstan Respýblıkasynyń eń joǵary nagradalarynyń biri.