Reseıge sanktsııa salǵany durys boldy - Nazarbaev

ASTANA. QazAqparat - "Rossııa 24" arnasyna suxbat bergen Memleket basshysy Nursultan Nazarbaev postkeńestik elderdiń ekonomıkasyn sıpattap, shıkizat berýshi memleketten daıyn ónim shyǵaratyn elge aınalý qajettigine basa nazar aýdardy, dep xabarlaıdy QazAqparat tilshisi.

"Bizde bári bar. Munaı da, tústi metaldar da. Endi, osynyń barlyǵyn óńdeýge tyrysý qajet. Indýstrıalızatsııanyń basty maqsaty da osy. Munaı arzandasa, ony óńdep, daıyn ónim retinde satý qajet. Gaz da solaı. Negizi, munaı xımııasynan plastmasqa deıin ónimniń túr-túrin jasaýǵa bolady. Qurylys materıaldary jáne taǵysyn taǵy. Oǵan qosa, allıýmınıı, mys sııaqty metaldar bar. Al shıkizatty óńdep, daıyn ónim retinde satsa, odan da kóp paıda tabýǵa bolady", - dedi N.Nazarbaev.

Osy oraıda Prezıdent Qazaqstan men Reseıdiń agrarlyq keshen jaǵynan uqsas ekenin eske saldy. Alaıda osy saladaǵy shıkizat ta durys óńdelmeıdi.

"Qazaqstanda da, Reseıde de úlken agrarlyq keshen bar. Alaıda biz bıdaıdy da, etti de, sútti de, kókónisti de aıaǵyna deıin óńdemeımiz. Eýropadan daıyn konservilerdi satyp ala salamyz. Ony ózimiz nege istemeımiz?.. Al endi osynyń bárin óńdep alý úshin mashına jasaý ónerkásibin barynsha damytý qajet. Ol óndiris zamanǵa saı bolýy shart. Máselen, munaıdy óńdeý úshin zamanaýı munaı óńdeý zaýyty qajet. Ol qural-jabdyqtar óte qymbat. Mine, osyny qolǵa alǵan jón. Sosyn nanotexnologııalar, balamaly energetıka, bıoxımııa sııaqty ǵylymı-texnologııalyq jumystardy da umytpaý qajet. Bir jaǵynan Reseıge sanktsııa salǵan durys boldy. Qazir oǵan jaqsy bir serpilis kerek. Bilekti sybanyp, jumysqa kirisse, bir jerden jaryp shyǵady", - dep atap kórsetti Memleket basshysy.