Reseıge salynǵan sanktsııalar azyq-túlik daǵdarysyna alyp keldi – mınıstrlik

NUR-SULTAN. QazAqparat – Kórshi Reseı Federatsııasyna salynyp jatqan sanktsııa saldary álemdik deńgeıde azyq-túlik daǵdarysyna alyp keldi. Bul pikirdi QR Saýda jáne ıntegratsııa mınıstrligi saýda komıteti tóraǵasynyń orynbasary Aıdar Ábildabekov ortaǵa saldy, dep habarlaıdy QazAqparat tilshisi.

«Azyq-túlik baǵasynyń ósimi Eýropa elderinde de baıqalady. Mysaly, Frantsııada ınflıatsııa 5,1 paıyz - rekordtyq kórsetkishke jetti. Baǵa ósiminiń álemdik úrdisi Qazaqstanda azyq-túlik baǵasy ósýiniń faktory bolyp otyr. Bıyl azyq-túlik baǵasy ósiminiń álemdik tendentsııasy Ýkraınadaǵy jaǵdaıǵa da baılanysty. Sonymen qatar Reseıge salynyp jatqan sanktsııalardyń saldarynan álem elderine jetkiziletin taýarlar tizimi buzyldy. Saldarynan álemdik deńgeıde azyq-túlik daǵdarysyn týdy», - dedi Aıdar Ábildabekov ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, álemdik deńgeıdegi saıasatkerler men jetekshi ekonomıster de baǵa turaqsyzdyǵyn boljap otyr.

«Ótken jyly Reseıde jaısyz egis naýqanyna baılanysty kókónisterge suranys artty. Ásirese kartop pen qyryqqabatqa suranys joǵary boldy. Saldarynan baǵa ósti. Taǵy bir sebep - 2019 jyly Reseı tarapynan qyryqqabatqa suranys joǵary boldy, sony eskergen bizdiń baǵbandar 2020 jyly kóp kólemde qyryqqabat ekti. Ózderińiz biletindeı, 2020 jyly pandemııa bastalyp, shekaralar jabyldy. Saldarynan ónimniń birazy dalada qaldy. Sáıkesinshe 2021 jyly qyryqqabat az egildi, az bolǵan soń suranys qaıta artty. Osy jaǵdaıdyń bári baǵa turaqsyzdyǵyna alyp keldi», - deıdi ol.