Reseıge salynǵan sanktsııaǵa baılanysty Qazaqstan iri saýda brendterimen tikeleı baılanys ornatyp jatyr

NUR-SULTAN. QazAqparat – Reseıge salynǵan sanktsııalarǵa baılanysty QR Úkimeti halyqaralyq saýda brendteriniń keńselerimen ózara is-qımyl jasaý boıynsha jumysty bastady. Bul QR Premer-Mınıstri Álıhan Smaıylov Májilis ókilderiniń depýtattyq saýalyna joldaǵan jaýabynda málim etti, dep habarlaıdy QazAqparat tilshisi.

«Búgingi tańda 300-ge jýyq halyqaralyq kompanııa ekonomıkanyń barlyq salalarynda ózderiniń Reseı naryǵynan ketetinin nemese ınvestıtsııasyn, taýarlardy jetkizýin nemese basqa qyzmetin shekteıtinin málimdedi. Bul rette taýarlardyń keń spektri Qazaqstanǵa sheteldik kompanııalardyń Reseıde ornalasqan dıstrıbıýtorlary arqyly jetkiziledi. Qazaqstan bıznes júrgizýdiń kóptegen mańyzdy tustary boıynsha (turaqty bank júıesi, bıznes pen ınvestorlardy memlekettik qoldaý sharalary, qolaıly salyq salý jáne t.b.) sheteldik kompanııalarǵa qyzyqty bolýy múmkin. Osyǵan baılanysty Úkimet olardyń Ortalyq Azııa jáne TMD óńirindegi jumys strategııasyn túsiný úshin osy kompanııalardyń keńselerimen ózara is-qımyl jasaý boıynsha jumysty bastady» dep jazylǵan Úkimet basshysynyń jaýabynda.

Onyń málimeti boıynsha, iri halyqaralyq kompanııalardyń kóshýi úshin búkil uıymdastyrýshylyq jáne zańnamalyq máselelerdi egjeı-tegjeıli pysyqtaý qajet.

«Osy baǵyttaǵy jumystar jalǵasady», - dep jazady Úkimet basshysy.

Aıta keteıik, Grýzııa, Ázerbaıjan, Túrkııa jáne Qazaqstan arasyndaǵy Middle Corridor birlesken kásiporny ázirlenip jatyr. Ol 2023 jyldyń basynda nemese ortasynda resmı túrde daıyn bolýy múmkin.