Reseıge pııaz apara jatqan 24 kólik shekaradan qaıtaryldy

ASTANA. QazAqparat – BQO shekarasynda Reseıge pııaz alyp ótpek bolǵan 24 kólik anyqtaldy, dep habarlaıdy QazAqparat Aýyl sharýashylyǵy mınıstrligine silteme jasap.

«Búgin Batys Qazaqstan oblysyndaǵy «Syrym» ótkizý pýnktine kelgen AShM Agroónerkásiptik keshendegi memlekettik ınspektsııa komıteti tóraǵasynyń m.a. tıisti túsinikteme berdi. Kásipkerler bul máselege qatysty oń jaýap berdi. Nátıjesinde pııaz tıelgen 24 avtokólik Túrkistan oblysyna oraldy. Qazir «Syrym» ótkizý beketindegi jaǵdaı turaqtandyryldy», - delingen mınıstrlik habarlamasynda.

Aıta ketsek, 28 qańtarda Qazaqstanda pııazdy el aýmaǵynan áketýge úsh aıǵa tyıym salyndy. Bul úshinshi elderdiń otandyq kókónisterge degen suranysyna baılanysty týyndady. Sondaı-aq QR Premer-Mınıstriniń orynbasary Serik Jumanǵarın elimizdegi pııaz shekteýlerine qatysty túsinik berdi.