Reseıge qyryqqabatty eksporttaýǵa tyıym salynǵan ba - QR AShM jaýap berdi

NUR-SULTAN. QazAqparat – Aýyl sharýashylyǵy vıtse-mınıstri Aıdarbek Saparov «qyryqqabatty Reseıge eksporttaı almaı otyrmyz» degen taqyryppen kesheli beri áleýmettik jelige taraǵan vıdeoǵa qatysty túsinik berdi, dep habarlaıdy QazAqparat tilshisi.

«Birqatar BAQ betterinde «qyryqqabatty shet memleketke satý týraly tyıym salynypty» degen syńaıda aqparat tarap júr. Iá, ishki qajettilikti tolyǵymen qamtamasyz etý maqsatynda qyryqqabatty eksporttaýǵa tyıym salyndy. Biraq bul tyıym Qazaqstan aýmaǵynan tek úshinshi elderge qyryqqabatty eksporttaýǵa qatysty bolyp otyr. Al Eýrazııalyq ekonomıkalyq odaq ishindegi elderge, onyń ishinde Reseıge qyryqqabatty eksportqa shyǵarýǵa eshqandaı shekteý qoıylǵan joq. Bul máseleni kóterip otyrǵan adamdar qujattardy durystap oqysa deımiz. Onda anyq jazylǵan», - dedi Aıdarbek Saparov búgin Ortalyq kommýnıkatsııalar qyzmetinde onlaın rejimde ótken baspasóz máslıhatynda.

Vıtse-mınıstr 6-7 sáýir aralyǵynda fermerlerden 105 ótinim kelip túskenin, onyń bárine 1702 tonna ónimniń sertıfıkaty berilgenin jetkizdi.

«EAEO aıasynda eshqandaı tyıym bolmaıdy. Búgin biz Túrkistan oblysynyń ákimdigimen el ishin qyryqqabatpen qamtamasyz etýge qatysty kelisimge kelip jatyrmyz. Al artylǵan ónim eksportqa shyǵaryla beredi. Reseıge ónimin shyǵarǵysy kelgen azamattardyń bárine fıtosanıtarlyq sertıfıkat beremiz», - dedi ol.