Reseıge azyq-túlik eksporttaýǵa tyıym salyna ma – mınıstrlik jaýaby

NUR-SULTAN. QazAqparat – Reseıge azyq-túlik eksportyna tyıym salý sheshimi tek kúrdeli jaǵdaılarda ǵana qabyldanady. Bul týraly QR Saýda jáne ıntegratsııa mınıstrligi saýda komıtetiniń tóraǵasy Erjan Qazanbaev aıtty, dep habarlaıdy QazAqparat tilshisi.

«Eksportqa tyıym salý – durys mehanızm emes. Mundaı sheshimdi tek kúrdeli jaǵdaılarda ǵana qabyldaý kerek. Eger biz eksportty jabatyn bolsaq, bizdiń otandyq óndirýshige taýar ótkizetin jańa naryqtardy tabý óte qıyn bolady. Sondyqtan biz bul máselege óte muqııat qaraımyz. Muny mindetti túrde bıznespen aldyn ala talqylaımyz, búkil esepteýlerdi júrgizemiz. Eger bizde tıisti qor bolsa nemese esh zapas bolmasa jáne qandaı da bir taýarlar boıynsha qaýip-qaterdi baıqasaq, bizde de tapshylyq qaýpi týyndasa, tek osy jaǵdaıda ǵana eksportqa tyıym salý týraly sheshim qabyldanady», - dedi E. Qazanbaev ortalyq kommýnıkatsııalar qyzmetinde ótken baspasóz máslıhatynda.

QR Aýyl sharýashylyǵy vıtse-mınıstri Jeńis Óserbaıdyń aıtýynsha, 12 naýryzdaǵy jaǵdaı boıynsha respýblıkada barlyǵy 1,3 mln tonna áleýmettik mańyzy bar azyq-túlik bar, onyń ishinde un – 144 myń tonna, qant – 90 myń tonna, kúrish – 39,3 myń tonna, makaron – 21 myń tonna jáne shamamen 900 myń tonna kókónis ónimderi jáne basqalary bar. Tıisinshe Qazaqstanda azyq-túlik tapshylyǵyna esh negiz joq.

Aıta keteıik, Qazaqstanda shamamen 90 myń tonna qant qory bar jáne respýblıka qantpen tolyq qamtamasyz etilgen.