Reseıge 160 tonna pııaz eksporttamaq bolǵandar ustaldy

QOSTANAI. QazAqparat – Jalpy salmaǵy 160 tonna pııazdy elimizden Reseıge alyp ótpek bolǵandar anyqtaldy. Bul týraly Qostanaı oblystyq Memlekettik kirister deparmatentiniń baspasóz qyzmetinen málim etti, dep habarlaıdy QazAqparat tilshisi.

«Pııazdy áketýge salynǵan tyıymǵa qaramastan, syrtqy ekonomıkalyq qyzmetke qatysýshylar Reseı Federatsııasyna eksporttaý áreketterin jalǵastyrýda. Máselen, Qostanaı oblysy boıynsha Memlekettik kirister departamenti «Qaıraq» avtokólik ótkizý pýnktinen jalpy salmaǵy 160 tonna pııazdy áketý boıynsha 8 árekettiń jolyn kesti. Qolda bar jedel aqparatqa sáıkes, pııazdy ózge taýar retinde kórsete otyryp, elden áketý áreketteri daıyndalýda. Osyǵan baılanysty tyıym salynǵan taýarlardy baqylaý kúsheıtilgen rejımge aýystyryldy», - dep málimdedi jergilikti quzyrly organnyń baspasóz qyzmetinen.

Eske salaıyq, buǵan deıin Qazaqstannan úsh aıǵa pııaz eksporttaýǵa shekteý qoıylǵan bolatyn.