Reseıǵarysh týrısterge ǵarysh aılaǵyn ashpaq

ASTANA. QazAqparat - Reseıǵarysh Baıqońyr (Qazaqstan) jáne Shyǵys (Reseı) ǵarysh aılaqtarynda týrıstik baǵytty damytýǵa nıetti, dep jazdy «Izvestııa» gazeti. Memlekettik korporatsııa kelýshilerge qyzmet kórsetpeıdi, munymen týrıstik operatorlar aınalysady dep kózdelgen.

Reseıǵaryshtyń resmı ókili Igor Býrenkovtyń sózine qaraǵanda, qajetti ınfraqurylymdyq ózgeristerden keıin týrısterge qyzmet kórsetetin operatorlar ashyq túrde tańdalady.

lenta.ru habarlaǵandaı, Býrenkov qazir ǵarysh aılaǵyna týrıst retinde barýǵa bolatynyn, alaıda bul qıynǵa soǵatynyn atap ótti. «Ekskýrsııalar júıeli túrde emes, ushyrý boıynsha qyzmet kórsetýge tartylǵan kásiporyndarmen kelisimshart boıynsha bir retten uıymdastyrylady», - dedi ol. Sondaı-aq týrısterdi qabyldaýǵa tıisti ınfraqurylym joq. Baıqońyrda eki qonaq úı bar, alaıda ushyrý kezinde olar lyq tolyp ketedi.

Jerdegi ǵarysh ınfraqurylymy nysandaryn qoldanysqa berý ortalyǵynda málim etkendeı, ınfraqurylym máselesin aldaǵy eki jylda, Astanada ótetin «EKSPO-2017» halyqaralyq kórmesine deıin sheshý kerek. «Júzden astam elden eki-úsh mıllıon qonaq keledi dep kútilýde. Bir júıege keltirip, múmkindikterdi tıisti deńgeıde paıdalanýǵa bolady», - dedi ortalyq bas dırektorynyń m.a. Ranohon Djýraeva.

RF Premer-mınıstri Dmıtrıı Medvedev tamyz aıynda Shyǵysqa barǵanda ǵarysh aılaǵyn týrıstik orynǵa aınaldyrýǵa bolatyndyǵyn aıtqan, dep jazdy «Interfaks».

24 tamyzda Reseıǵarysh ǵarysh aılaǵyn damytýǵa 900 mıllıard rýbl bólýdi suraǵan. Memlekettik korporatsııanyń ǵylymı-tehnıkalyq keńesi basshysy ıÝrıı Koptevtiń sózine qaraǵanda, 560 mıllıard Shyǵystaǵy ushyrý alańdarynyń qurylysy men onyń ınfraqurylymyn damytýǵa baǵyttalýy tıis.

Foto: fastwalls.ru