Reseıdiń Túmen oblysynda qazaq synyby ashyldy
Reseıdiń Túmen oblysynda 28 qazan qazaq synyby ashylyp, qazir 25 bala óz ana tilinde bilim alyp jatyr. Alaıda munda ustazdar men oqýshylarǵa arnalǵan qazaq tilindegi oqý-ádistemelik quraldar tapshy.
Túmendegi qazaq balalaryna qoldaý kórsetý maqsatynda búgin oblystyq Qazaqstan halqy Assambleıasynda «Baǵa jetpes syı» atty aktsııa ótti. Oǵan Túmen oblysy qazaqtarynyń ulttyq-mádenı avtonomııasynyń tóraǵasy Esenǵalı Ibraev, oblystyq bilim basqarmasynyń, tilderdi damytý basqarmasynyń, ortalyqtardyń ókilderi qatysty.
SQO Qazaqstan halqy Assambleıasynyń málimetinshe, soltústikqazaqstandyqtar jaqynda ashylǵan qazaq synybyna kómek retinde jáne onda bilim alyp jatqan qazaq balalaryna qoldaý kórsetý maqsatynda reseılik áriptesterine 200 kitapty syıǵa berdi. Qazaq tilin tereń meńgerýge múmkindik beretin ǵylymı-ádistemelik quraldar, qazaq tilindegi oqýlyqtar jáne qazaqtyń aqıyq aqyny Maǵjannyń jyr jınaqtary, Abaıdyń qara sózderi, «Dańqty adamdar» serııasymen shyqqan ádebıet, taǵy basqa kóptegen qundy shyǵarmalar balalardyń ǵana emes, túrli jastaǵy til úırenýshilerdiń keregine jaraıdy.
«Bolashaqta mundaı jumys jalǵasyn tabady. Tilderdi damytý basqarmasy tarapynan osy sııaqty jumystar 2015 jyldan iske asyrylyp keledi. Bul - «Tilderdi damytý men qoldaý» memlekettik baǵdarlamasy aıasynda júzege asyrylady. Bul jobanyń shetelde turyp jatqan etnıkalyq qazaqtardy oqý-ádistemelik quraldarmen qamtýǵa kómek kórsetý degen arnaıy tarmaǵy bar», - deıdi SQO Tilderdi damytý jónindegi basqarmanyń bólim jetekshisi Ásem Súleımenova.