Reseıdiń ónerkásip kásiporny ókilderimen maman daıarlaý máselesi talqylandy

ASTANA. QazAqparat - QR Indýstrııa jáne ınfraqurylymdyq damý mınıstri Marat Qarabaev Máskeýge jumys sapary aıasynda Reseı Federatsııasynyń úkimet tóraǵasynyń orynbasary – RF Ónerkásip jáne saýda mınıstri Denıs Mantýrovpen, sondaı-aq 25 óńdeý ónerkásibi kásipornynyń ókilderimen kezdesti, dep habarlaıdy QR IIDm baspasóz qyzmeti.

Kezdesý barysynda taraptar jeńil ónerkásipti damytý jáne qurylys materıaldaryn óndirý máselelerin, sonymen birge hımııa ónerkásibi úshin mamandar daıarlaý boıynsha ózekti suraqtardy talqylady. Osy rette ónerkásip salasyndaǵy yntymaqtastyq Qazaqstan men Reseıdiń arasyndaǵy ekijaqty qatynastardyń negizgi baǵyty ekenin aıta ketken jón.

«Ekijaqty áriptestigimizdiń baǵyttary arasynda ónerkásiptik kooperatsııanyń alar orny erekshe. Qazir 26 birlesken joba sátti iske asyrylyp, taǵy da 7 myńnan astam jumys ornyn ashýdy kózdeıtin 23 iri joba júzege asyrylyp jatqanyn aıta ketý kerek», - dedi QR IIDM basshysy.

Bul rette 2022 jyldyń shildesinde Qazaqstan Ekaterınbýrgtegi «Innoprom-2022» halyqaralyq ónerkásiptik kórmesinde áriptes memleket retinde tabysty óner kórsetkenin aıta ketken oryndy. Nátıjesinde iskerlik qarym-qatynasty joǵary deńgeıge arttyrýǵa baǵyttalǵan birlesken is-qımyl baǵdarlamalary men 27 ekijaqty sharttarǵa qol qoıyldy.

Vedomstvo basshysy Marat Qarabaev bıyl otandyq ónerkásip kásiporyndary Ekaterınbýrg qalasynda ótetin «INNOPROM» halyqaralyq kórmesine qatysatynyn atap ótti. Sonymen qatar osy jyldyń qyrkúıeginde Astanada Memleket basshysynyń, sondaı-aq EAEO, Pákistan, Túrkııa, Úndistan, Iran, Ázirbaıjan jáne basqa da elderdiń ulttyq ekspozıtsııalary men jekelegen kompanııalarynyń qatysýymen «INNOPROM Qazaqstan» kóshpeli ónerkásiptik kórmesin ótkizý josparlanyp otyr.

Esterińizge sala keteıik, Máskeýge jasaǵan jumys sapary barysynda QR Indýstrııa jáne ınfraqurylymdyq damý mınıstri Marat Qarabaev kórshiles memlekettiń Qurylys jáne turǵyn úı-kommýnaldyq sharýashylyq jónindegi mınıstri Irek Faızýllınmen, RF Kólik mınıstri Vıtalıı Savelevpen jáne Reseı Federatsııasynyń Energetıka mınıstri Nıkolaı Shýlgınovpen kezdesti. Atalǵan kezdesýlerde sáýlet, qala qurylysy jáne tutastaı qurylys salasyn damytý, bıtým jetkizý máseleleri, sondaı-aq júk ári jolaýshylar avtotasymaly baǵytyndaǵy ekijaqty úkimetaralyq kelisim jobasyn daıyndaý máseleleri qaralǵan bolatyn.

Foto: QR IIDM baspasóz qyzmeti