Reseıdiń Lenıngrad oblysynan batysqazaqstandyq maıdangerdiń bákisi tabyldy
Batysqazaqstandyq ólketanýshy Aıbolat Qurymbaevtyń aıtýynsha, oǵan Sankt-Peterbýrg qalasynan iz kesýshi Nıkolaı Lebedev habarlasyp, sarbazdyń bákisi tabylǵanyn jetkizgen.
Bákide Jakslykov R. dep oıylyp jazylǵan.
«Aıbolat, bazadan qarap, onyń Qazaqstannan ekenin bildim. Marapattaryna qaraǵanda, óte ójet sarbaz bolǵan. Soǵystan aman-esen oralǵan, odan arǵy taǵdyryn bilmeımin. Qazaqstanda adamdar bir-birimen týystyq baılanysyn úzbeýge tyrysady ǵoı, jaqyndaryn tabý múmkindigi bar ma? Men bul jádigerdi maıdangerdiń otbasyna nemese jergilikti mýzeıge tapsyrǵym keledi», dep jazǵan hatynda N.Lebedev.
A.Qurymbaev osy málimetti áleýmettik jelige júktep, izdeý salǵannan keıin maıdangerdiń urpaqtary da tabyldy.
Aldymen maıdangerdiń inisi Násıbolla Jaqsylyqovtyń uly Nurbol habarlasty. Ol R.Jaqsylyqovtyń uly Isataıdyń Oral qalasynda turatynyn jetkizdi.
«Iá, ákemniń bákisi tabylǵanyn estip jatyrmyz. Ákem soǵystan oralǵannan keıin burynǵy Chapaev (qazir Aqjaıyq) aýdany «Pervomaı» keńsharynda 1984 jyly zeınetke shyqqansha júrgizýshi boldy. 1996 jyly qarashada ómirden ozdy. Maıdanda artıllerııada baılanysshy bolǵanyn, eki ret aýyr jaralanyp, qaıta qatarǵa qosylǵanyn aıtyp otyratyn. Bákisi jóninde buǵan deıin bilgen joqpyz», dedi QazAqparat tilshisine Isataı Jaqsylyqov.
Áýeli qatardaǵy jaýynger, keıin efreıtor bolǵan maıdangerdiń óz qolymen jazǵan ómirbaıanyna qaraǵanda, soǵysqa 1942 jyly tamyzda attanyp, jeltoqsanda shaıqasty Orel túbinde bastaǵan. Marshal I.Bagramıan basshylyq etken Orel, Kýrsk, Smolensk, Brıansk baǵytyndaǵy shaıqastarǵa qatysyp, І jáne ІІ Prıbaltıka maıdandarynda bolǵan.
«Jaýdyń órshelene qarsylasqanyna qaramastan, bizdiń armııa olardyń saǵyn syndyra bastady. Orel qalasy eki-úsh ret qoldan-qolǵa ótti. Men sol kezde 76 mıllımetrlik tankige qarsy zeńbirektiń kózdeýshisi edim. Qarsy shabýylǵa shyqqan jaý tankilerine toıtarys bere otyryp, beseýin órtep jiberdim. Orel qalasyn azat etýdegi erligim úshin úshinshi dárejeli Dańq ordenimen nagradtaldym. Smolensk qalasy úshin de keskilesken urys boldy. Janyp jatqan bizdiń tankiniń ishinen kolonna komandıri, maıor V.Ilındi alyp shyǵyp, boraǵan oqqa qaramastan, sanıtarlyq bólimge jetkizdim. Bul úshin «Erligi úshin» medaline ıe boldym. Brıansk qalasyn azat etýde ózime bekitilgen ýchaskede aldaǵy jaıaý áskerlermen úzdiksiz baılanys jasaǵanym úshin ekinshi dárejeli Dańq ordenimen marapattaldym. Latvııa jerinde aıaǵymnan jaralanyp, tórt aı gospıtalde emdeldim. Sodan keıin de jeńil kontýzııa alyp, eki aı gospıtalda boldym. «Erligi úshin» medalin eki ret aldym. Elge 1947 jyly oraldym. 1985 jyly ekinshi dárejeli Otan soǵysy ordenin aldym. Barlyǵy 3 orden, 13 medaldyń ıegeri boldym», dep jazyp ketken eken.
Baılanysshy únemi batyldyǵymen tanylyp, sonyń ishinde alǵy shepte úzilgen symdy jalǵap qana qoımaı, birde dushpannyń qos barlaýshysyn da qolǵa túsirip qaıtqan. Taǵy birde aýyr jaralanǵan qandykóılek joldasy Alekseı Tsygankovty oq astynan alyp shyqqan.
Batysqazaqstandyq ólketanýshy Ahmedııar Batyrhanovtyń naqtylaýynsha, úshinshi dárejeli Dańq ordenimen marapattaý qaǵazynda R.Jaqsylyqovtyń 1944 jyly 31 qańtarda Dvorets tirek pýnkti úshin qandy shaıqasta 23 ret úzilgen baılanys jibin jalǵaǵany aıtylǵan. Qaıtar jolda jaý oǵynyń astynda qalyp, jaralansa da, baılanystyń úzilmeýin qamtamasyz etken. Lenıngrad maıdanynda da shaıqasqan batysqazaqstandyq erjúrek jaýynger 1620-jeńil artıllerııa polkynda aǵa telefonshy bolǵan.
Aıta ketetin jaıt, Ekinshi dúnıejúzilik soǵysta úsh birdeı Dańq ordenin ıelengender Keńes Odaǵynyń Batyrymen teń bolyp sanaldy.
Aqjaıyq aýdany shyǵarǵan «Maıdangerler» degen jınaqta da Rahym Jaqsylyqovtyń qysqasha ómirbaıany keltirilgen.
«Nıkolaı Lebedevke maıdangerdiń urpaqtary tabylǵanyn aıttym. Endi jaýap kútip otyrmyn», dedi Aıbolat Qurymbaev.