Reseıdiń kýrorttyq qalasyn qyzyl qońyzdar basty

NUR-SULTAN. QazAqparat – Áleýmettik jelilerde Reseı Federatsııasynyń Anapa kýrorttyq qalasynda qyzyl qońyzdardyń qaptap ketkeni túsirilgen vıdeojazbalar taratylyp jatyr, dep habarlaıdy QazAqparat.

«Qonaqúıde, jaǵajaıda júrý múmkin emes. Barlyq jatyn oryndar bos. Bul mýtatsııalanǵan qyzyl qońyzdar tárizdi. Olar shaǵyp alady. Barlyq jerde júr. Qolyńdy sozsań boldy, birden kóresiń», - deıdi vıdeodaǵy jas qyz.

Shynymen de, vıdeoda jaǵajaıdy jaılap alǵan qyzyl qońyzdardyń tym kóp ekeni kórinip tur.

Taǵy bir vıdeoda eki er adamnyń qyzyl qońyzdardan qashyp júrgeni baıqalady.

«Mundaıdy buryn kórmegen edim», - deıdi kadrdaǵy er adam.

BAQ jándikterdiń Anapa jaǵajaıyn basyp alýy týraly baıandap otyr.

«Entomolog mamandardyń aıtýynsha, qyzyl qońyzdyń teńizge qaraı jappaı ushyp kelý sebepteriniń biri – salqyn ári jańbyrly jaz mezgili. Aýa raıynyń qalypty emes jaǵdaıy jándikter mıgratsııasyn kúsheıtedi. Anapadaǵy jańbyrdan keıin kelgen ystyq kún raıy qyzyl qońyzdar úshin jaıly orta qalyptastyrǵan», - dep habarlaıdy qalalyq Anapa.Media portaly.

Mamandar qyzyl qońyzdardyń 10 jylda bir ret jappaı kóbeıetinin atap ótti. Jándikterdiń árbir túriniń kóbeıý dınamıkasynyń tolqyny bolady.

Anapa – Reseı ońtústiginde, Qara teńiz jaǵalaýynda ornalasqan iri qala. Jyl saıyn munda týrıster kóp keledi.