Reseıdiń Qazaqstanmen shekarasynda iri órt tutandy

BARNAÝL. QazAqparat – Reseıdiń Altaı ólkesi Mıhaılovsk aýdanynda tutanǵan iri otty sóndirýge órt sóndirý poıyzy tartyldy. Temirjol kóligi oqıǵa ornynda jumys istep jatqandarǵa 120 tonna sý jetkizip, arnaıy tehnıkalardy sýmen qamtamasyz etedi. Bul týraly Batys-Sibir temirjolynyń baspasóz qyzmetinen málim etti, dep habarlaıdy QazAqparat TASS-qa silteme jasap.

13 sáýir kúni saǵat 13:30-da Klıýchevsk orman sharýashylyǵynyń órt-baqylaý munarasynyń kezekshisi Qazaqstan jaǵynan tútindi baıqaǵan. Bul týraly altapress.ru Altaı ólkesiniń Tabıǵatty qorǵaý mınıstrliginiń málimetine silteme jasap habarlady.

Ot Qazaqstanmen shekarada jalyndap jatyr. Avıatsııalyq orman kúzetiniń aqparatyna sáıkes, jalyn 1 myń gektar aýmaqta oqshaýlandyryldy. Órt sóndirýshiler ony 800 adam turatyn Bastan aýylynan 9 km jerde óshire aldy.

Tilsiz jaýmen kúreske 82 maman, 42 tehnıka, sonyń ishinde túkushaq, 4 avtotsısterna, 24 órt sóndirý tehnıkasy, 8 traktor jumyldyrylǵan. Jaǵdaıdy ekpindi jel qıyndatyp otyr.

Jalyn úılerge jaqyndaǵan jaǵdaıda kómek kórsetý úshin qutqarýshylar Bastan aýylyna jáne taıaý ornalasqan ózge de eldi mekenderge jetti. Barlyq halyq órt qaýpi týraly eskertildi.