Reseıdiń BQO-men shekaralas «Mashtakov» beketinde jóndeý jumystary júrgiziledi
BQO memlekettik kirister departamentiniń basshysy Baýyrjan Aınabekovtiń óńirlik kommýnıkatsııalar qyzmeti alańynda ótken brıfnngte málim etkenindeı, Reseı tarapynan túsken málimetke sáıkes Samara men Batys Qazaqstan oblysy shekarasyndaǵy «Mashtakov» beketinde búginnen bastalatyn jol jabynyn tóseý jumystary 31 tamyzǵa deıin jalǵasady. Sonymen qatar bekette ınspektorlyq-qaraý kesheni ornatylady.
B.Aınabekovtiń aıtýynsha, Reseıdiń bes óńirimen shektesetin Batys Qazaqstan oblysynda «Syrym», «Tasqala», «Shaǵan», «Aqsaı», «Jánibek» jáne «Orda», barlyǵy alty avtokólik ótkizý beketi jumys isteıdi.
«Osylardyń ishinde «Syrym» beketi arqyly júk kólikteri eń kóp ótedi. Ortasha eseppen kúnine 1331 júk kóligi ótse, sonyń 704-i Qazaqstannan Reseıge, 627-si Reseıden bizdiń elge bet alady. Sondyqtan «Mashtakov» beketinde jóndeý jumystarynyń júrgizilýine baılanysty shekarada keptelis bolmas úshin júrgizýshiler basqa balamaly baǵyttardy tańdaǵany jón. Mysaly, «Shaǵan» jáne «Tasqala» beketteri arqyly óte alady», dedi B.Aınabekov.
QR UQK Shekara qyzmetiniń BQO boıynsha departamenti bastyǵynyń orynbasary Talǵat Shaımardanov atalmysh baǵytta kólik qozǵalysynyń eki esege qysqaratynyn jetkizdi. Onyń sózine qaraǵanda, «Mashtakov» pen «Syrym» beketinen kún saıyn 3 myń avtokólik (1500-i – júk, 1500-i – jeńil kólikter) ótse, endi bulardyń sany azaıady. «Syrym» tranzıttik beketi arqyly Almaty, Bishkek, Ózbekstan jáne basqa Ortalyq Azııa elderi baǵytynda qatynaıtyn júk kólikteriniń maýsym kezinde kóbeıetini belgili. Olar Reseımen qatar Eýropa elderine taýar tasymaldaıdy.
«Shaǵan» eki jaqty ótkizý beketi bolyp sanalady, ıaǵnı odan tek Qazaqstan men Reseı azamattary ǵana ótedi. Al «Tasqala» kóp jaqty ótkizý beketi arqyly ózara kelisim jasalǵan basqa elderdiń azamattary da óte alady. Júrgizýshiler aldyn ala jaǵdaıdy bilip, ózderine ońtaıly beketterdiń qyzmetin paıdalana alady. Departamentte baılanys telefondary bar, habarlasýǵa bolady», dedi T.Shaımardanov.