Reseıdiń «Baıqońyr» aılaǵyndaǵy josparlary ózgergen joq – Baǵdat Mýsın

NUR-SULTAN. QazAqparat – QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın «Baıqońyr» ǵarysh aılaǵynda Reseı tarapymen áriptestikke qatysty jaǵdaıdy túsindirdi, dep habarlaıdy QazAqparat tilshisi.

Búgin Májilistiń jalpy otyrysynan keıin tilshiler mınıstrden «Baıqońyr» ǵarysh aılaǵyn jalǵa alýdan Reseıdiń bas tartýy múmkindigine qatysty suraq qoıdy.

«Keshe Rogozın myrza («Roskosmos» basshysy Dmıtrıı Rogozın) josparlar ózgermegenin aıtty. Olar Qazaqstanmen arada josparlanǵan barlyq ǵarysh baǵdarlamalaryn damytatynyn jarııalady. Atap aıtqanda, reseılik áriptestermen kelissózder aldaǵy ýaqytta bolady dep josparlanyp otyr. Sebebi tıisti ózgerister bolyp jatyr», - dedi B. Mýsın tilshiler saýalyna jaýap bere otyryp.

Osy oraıda mınıstr 15-20 sáýir kezinde birqatar másele boıynsha reseıliktermen kelissózder josparlanǵanyn aıtty. Onyń ishinde taıaý jyldarǵa arnalǵan perspektıvaly jobalar qaralady.

Sonymen qatar Baǵdat Mýsın «Baıqońyr» ǵarysh aılaǵyn jalǵa alǵany úshin Reseı jaǵy qansha qarjy tólep jatqanyn atap ótti.

«Jylyna 100 mln AQSh dollarynan astam qarajat eskerilgen. Shart 2050 jylǵa deıin bekitilgen», - dedi vedomstvo basshysy.