Reseıdiń Astrahan oblysyndaǵy Qurmanǵazy ortalyǵy mańyzdy týrıstik nysanǵa aınaldy

MÁSKEÝ. QazAqparat – Astrahan oblysyna jumys sapary aıasynda Qazaqstannyń Reseıdegi Elshisi Ermek Kósherbaev Volodarsk aýdany, Altynjar aýylyndaǵy Qurmanǵazy atyndaǵy óńirlik mádenı ortalyqqa bardy, dep habarlaıdy QazAqparat.

Dıplomatııalyq ókildiktiń baspasóz qyzmetinen habarlaǵandaı, E. Kósherbaev jergilikti qazaq qoǵamdyq birlestikteriniń ókilderimen kezdesti. Otandastardy tolǵandyratyn, eń aldymen, qazaq tilin úırenýge qatysty ózekti máseleler qozǵaldy. Astrahandaǵy QR Bas konsýldyǵynyń basshysy Taýboldy Úmbetbaev óńirdiń mádenıet jáne týrızm mınıstri Olga Prokofevaǵa qazaq tili synyptary bar eki mektepte onlaın oqytý úshin «Otandastar» qorynyń qoldaýymen satyp alynǵan kompıýterlik tehnıkany tapsyrdy.

Esterińizge sala keteıik, Ortalyq 2005 jyly qazaqtyń uly kúıshisi, dombyrashy-kompozıtor Qurmanǵazy kesenesiniń janynda ashylǵan bolatyn. Osy ýaqyt ishinde keshen jyl saıyn álemniń túkpir-túkpirinen myńdaǵan qajy jáne týrıster keletin aımaqtyń mańyzdy týrıstik ornyna aınaldy.

Avtory: Narymbek Ismaǵulov