Reseıdiń Altaı ólkesinde qazaq áni shyrqaldy

ASTANA. QazAqparat - Reseıdiń Altaı ólkesiniń Barnaýyl qalasynda Qaraǵandy oblysy Táttimbet atyndaǵy akademııalyq ulttyq aspaptar orkestriniń «Uly Dala sazy» atty kontserti ótti, dep habarlaıdy QazAqparat.

Táttimbet atyndaǵy akademııalyq orkestr álemniń 40-tan astam elinde gastroldik saparda bolyp, álemge tanylsa da Barnaýlda Qazaqstannyń Syrtqy ister mınıstrligine qarasty Otandastar qorynyń uıytqy bolýymen birinshi ret óner kórsetti.

Kontserttiń ótýine septigi tıgen taǵy bir uıym – Altaı ólkesindegi Qazaq ulttyq avtonomııasy. Avtonomııa jetekshisi Murat Bekmuratovtyń aıtýynsha, ulttyq áýender babalar rýhyn oıatady. Bir jarym saǵatqa sozylǵan kontserttiń sońynda qandastarymyz «Atameken» ánin qosyla shyrqady.

Táttimbet atyndaǵy akademııalyq orkestr múshelerine Altaı aımaǵynyń gýbernatory Vıktor Tomenko, Altaı aımaǵynyń zań shyǵarýshy organynyń tóraǵasy Aleksandr Romanenko, Barnaýyl qalasynyń ákimi Vıacheslav Frank jáne Barnaýyl qalalyq dýmasynyń tóraǵasy Býevıch Galına ystyq yqylastaryn bildirip, arnaıy gúl shoqtaryn jiberdi.

QR Parlamenti depýtattary Ǵalıasqar Sarybaev pen Bolat Kerimbek jáne jazýshylar Bota Baman, Jádı Shákenuly, Kádirbek Qunypııauly, jýrnalıst Aýyt Muqıbekuly bar zııaly qaýym ókilderi jergilikti turǵyndarmen tildesip, usynys-pikirlerin tyńdady.

Kontserttiń jabylý saltanatyn túıindegen «Otandastar qorynyń» prezıdenti Abzal Saparbekuly óz sózinde strategııalyq áriptes eki el arasynda saıası-ekonomıkalyq, ınvestıtsııalyq yntymaqtastyqpen qatar, mádenı-gýmanıtarlyq baılanystar joǵary deńgeıde ekenine toqtalyp, osy kontsert te halyqtar arasyndaǵy dostyq qarym-qatynasqa oń septigin tıgizedi dep senim bildirdi. Jalpy, Otandastar qorynyń etnıkalyq qazaqtarmen qatar, kezinde Qazaqstanda týyp-ósken, keıinnen óz tarıhı otanyna oralǵan burynǵy otandastarmen de jumys júrgizýge jaýapty resmı mekeme ekenin atap ótti.

Sondaı-aq, qor basshysy Abzal Saparbekuly Altaı ólkesindegi Qazaq ulttyq avtonomııasynyń jetekshisi Murat Bekmuratovty Qazaqstan Respýblıkasy Prezıdenti Qasym-Jomart Toqaevtyń Alǵys hatymen marapattady. Sonymen qatar, birqatar belsendi azamattarǵa, atap aıtqanda, Janat Myrzahmetulyna, Janar Súleımenovaǵa, Baqytjan Soltanǵazınovaǵa, Aıda Beksultanovaǵa Otandastar qorynyń Alǵys haty jáne «Alǵys» estelik medali tabys etildi.