Reseıden kólik alýǵa kómektesemin degen óskemendik alaıaq 2,6 mln teńge paıda kórgen
04:06, 27 Jeltoqsan 2022
ÓSKEMEN. QazAqparat – ShQO turǵyndaryna Reseıden kólik alýǵa kómektesetinin aıtqan alaıaq 2,6 mln teńge paıda kórgen, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, qalalyq PB Ertis polıtsııa bóliminiń tártip saqshylary Reseıden kólik alýǵa kómektesetinin aıtyp, turǵyndardy aldaǵan áıeldi qolǵa túsirdi.
28 jastaǵy óskemendik 3 uqsas qylmys jasaǵany úshin kúdikke ilingen.
«Áıel adam Reseı Federatsııasynan avtokólik jetkizip beremin dep aldap, Glýbokoe aýdanynyń turǵyndarynan shamamen 2 600 000 teńge aqsha alǵan. Alaıda arada biraz ýaqyt ótkende turǵyndarǵa kólik te jetkizilmedi, aqshasy da qaıtarylmady. Sol kezde aldanyp qalǵanyn túsingen olar polıtsııaǵa habarlasqan», - delingen aqparatta.
Qazirgi ýaqytta alaıaq tergeý ızolıatoryna qamaýǵa alynǵan.
Atalǵan fakti boıynsha QR QK-niń 190-baby 1-bóligimen qylmystyq is qozǵaldy.