Reseıden keletin ımport Qazaqstanda 30 paıyzǵa qymbattady
«Bıyl geosaıası jaǵdaıǵa qatysty ınflıatsııanyń joǵary qarqyny búkil álem úshin problemaǵa aınalyp otyr. Atap aıtqanda, AQSh pen Eýrolyq odaq sońǵy 40 jyldaǵy ınflıatsııanyń rekordtyq deńgeıine tap boldy, ıaǵnı shamamen 10%. Al, azyq-túlik taýarlary úshin odan da joǵary deńgeıde baıqaldy. Kórshi elderde de ınflıatsııanyń joǵary deńgeıi tirkeldi, shamamen 14% -15% boldy», - dedi Á. Smaıylov Májilistiń jalpy otyrysynda depýtattardyń saýalyna jaýap bere otyryp.
Onyń aıtýynsha, ınflıatsııanyń joǵary bolýyna energetıkalyq resýrstarǵa, mıneraldy tyńaıtqyshtarǵa, azyq-túlik taýarlaryna baǵanyń ósýi jáne kólik logıstıkasynyń problemalary yqpal etti.
«Bizdiń jaǵdaıda Reseı Federatsııasyna ımporttyń kúrt tómendeýine baılanysty RF rýbliniń dollarǵa jáne tıisinshe teńgege qatysty 30%-ǵa kúrt nyǵaıýy keri áserin tıgizdi. Reseıden Qazaqstanǵa keletin barlyq ımport avtomatty túrde 30%-ǵa qymbattady. Al, bizdiń jalpy ımportta Reseıdiń úlesi 40 paıyzǵa jýyqtaıdy. Bul teris faktorlardyń barlyǵyn byltyr respýblıkalyq bıýdjetti qalyptastyrý kezinde boljaı almaǵanymyz anyq», - dedi Úkimet basshysy.