Reseıden Qazaqstanǵa qydyryp kelgen 45 týrıst jolda qar qursaýynda qalǵan

KÓKShETAÝ. QazAqparat - Aqmola polıtseıleri Reseıden kelgen 45 týrısti qarly trassadan jylytý pýnktine jetkizdi, dep habarlaıdy QazAqparat polıtsııaǵa silteme jasap.

24 aqpan kúni patrýl polıtsııa batalony №4 vzvodynyń komandıri Erlan Darbaev pen ınspektor Sanjar Qojaǵulovqa «Jaqsy - Esil - Buzulyk» avtojolynda Reseı Federatsııasynyń 45 azamaty bar avtobýs turǵany týraly habar túsken.

Mán-jaıdy anyqtaý barysynda Reseıdiń Chelıabınsk qalasyndaǵy týrıstik fırmaǵa tıesili avtobýs Astana qalasyna 45 týrısti alyp kele jatqany belgili boldy.

Bir top adam túnde Qostanaı qalasynan shyqqan. Alaıda aýa raıynyń qolaısyzdyǵyna jáne qozǵalystyń shektelýine baılanysty kólik quraly qarly jolda turyp qalǵan.

Polıtsııa ekıpajy týrıster tamaǵyn ishý úshin jaqyn mańdaǵy dámhanaǵa, sodan keıin Esil qalasyndaǵy jylytý pýnktine deıin avtobýsty ertip júrdi.

Sheteldikter polıtseılerge alǵys aıtty.