Reseıdegi jaǵdaıǵa qatysty elge oralǵysy kelgen stýdentter boldy – SІM

ASTANA. QazAqparat – Qazaqstan azamattarynyń Reseıdegi jaǵdaıǵa baılanysty elge oralýy boıynsha Syrtqy ister mınıstrliginiń resmı ókili Aıbek Smadııarov túsinik berdi, dep habarlaıdy QazAqparat tilshisi.

Syrtqy ister mınıstrliginde ótken baspasóz máslıhatynda A.Smadııarovqa: «Reseıdegi sońǵy kúndergi jaǵdaıǵa baılanysty elge oralamyn degen azamattar nemese stýdentter boldy ma?», - degen saýal qoıyldy.

«Reseıdegi jaǵdaı boıynsha elge kelemin degen stýdentter boldy. Sońǵy 2-3 kún ishinde «Azamattarymyzdy nelikten evakýtsııa jasamaısyzdar? degen kóp suraqtar boldy. Aıtaıyn degenim, eki el arasyndaǵy shekara ashyq, Reseıde soǵys jarııalanǵan joq. Áýe qatynasy da qalpynda, poıyzdar men kólikter júrip jatyr. Sondyqtan ár adamnyń óz erki. Azamattarymyzdy evakýatsııalaıtyn jaǵdaı emes», - dep jaýap berdi Aıbek Smadııarov.

Sondaı-aq SІM ókili jalpy kórshi eldegi jaǵdaı boıynsha Qazaqstannyń ustanymyna qatysty pikir bildirdi.

«Qazaqstannyń ustanymyn Memleket basshysy naqty aıtyp ketti. Bul – Reseıdiń ishki isi», - dep qysqa qaıyrdy.